24 сағат

*Испания аумағында­ғы НАТО әскери базасында гректің жойғыш ұшағы апатқа ұшырады. Ұшақ әуеге көтеріле бере ан­гар­дың үстіне құлап, жа­рыл­ған. Оқиға салдарынан Испа­нияға біліктіліктерін жетіл­діруге келген 8 франция­лық әскери ұшқыш пен 2 гре­киялық әскери ұшқыш қаза тапты. Тағы 13 адам түрлі дең­гейде дене жарақатын алды. * Күрд көтерілісшілерінің күштері Сирияның Айн әл-Араб (Кобани) қаласын толықтай өз бақылауына алды. Қала түрік шекарасына жақын маңда орналасқан. Қаланы «Ислам мемлекеті» қарулы жасақтарынан тазартуға бір­неше айға созылған ұрыс қи­мыл­дарынан кейін қол жетіп отыр. АҚШ-тың әскери-әуе күш­тері сириялық күрдтерге әуеден қолдау көрсеткен. * Пәкістанның арнайы қызметтері терроризмге қаты­сы бар деген күдікпен кем де­генде 9 мың адамды тұт­қын­даған. Қамауға алынған­дар­дың арасында 3 мыңнан ас­там молда мен медресе мұға­лім­дері, сондай-ақ, 3,5 мың­дай ауғандық босқын бар. Ұс­тал­ғандардың ең көбі, яғни 6702 адам негізінен пуш­тун­дар тұратын Хайбер-Пахтунхва провинциясының үлесіне тиеді. *  2011 жылдың қаң­тар­ында жаппай наразылық шерулері барысында та­ғы­нан тайдырылған Мысыр президенті Хосни Мүбәрактің екі ұлы түрмеден шығарылды. «Ассошейтед Пресс» агент­тігінің хабарлауына қарағанда, Аля мен Гамаль қамаудан боса­тылғаннан кейін ел астанасы – Каир қаласының оңтүстігінде орналасқан өз үйлеріне жол тартыпты. * Куба революция­сы­ның көсемі Фидель Кастро алғаш рет АҚШ пен Куба арасында дипломатиялық қарым-қатынас қайта орнауына байланысты түсінік берді. «Рейтер» агенттігінің хабарлауынша, ол АҚШ президенті Барак Обама мен қазіргі Куба басшысы Рауль Кастро бастаған жақындасу туралы қадамдарды құп­тай­тынын білдіріпті. Бірақ АҚШ саясатына сенбейтінін де ашық айтқан. * Ресей Тәжікстандағы әскери базасын күшейту ниетінде. Мұндай шешімге тараптар Ресей қорғаныс министрінің орынбасары Анатолий Антоновтың Ду­шан­беге сапары барысында келсе керек. Антоновтың сөзіне қа­рағанда, Тәжікстан қарулы күштерін нығайту арқылы Ресей өзінің қауіпсіздігін де нығайта түседі. * Аргентина президенті Кристина Фернандес де Кирш­нер елдің барлау ведомс­твосын тарату туралы жоспары бар екенін жария етті. Оның пікірінше, атал­ған ведомство жемқор­лықтың ошағына айналған. Прокурор Альберто Нисман­ның қазасы сыртында да агенттіктің жемқорлыққа салынған қызметкерлері тұруы ықтимал. * Америкалық миллиардер Дональд Трамп рес­публикашылар тарапынан президенттік сайлауға қайта түсуге уәде беріп отыр. Мен бұл лауазымды атқара алатыныма толық сенімдімін, дейді ол. Трамптың пікірінше, рес­публикашылар қатарынан басқа лайықты үміткер көзге көрініп тұрған жоқ. Трамп 2008 және 2012 жылдарғы президенттік сайлауға түсемін деп алып, артынан тайқып шыққан еді. Ақпарат агенттіктерінің материалдары негізінде әзірленді.