Қостанай облысында әкімнің орынбасарын 1 теңге төлеуге міндеттеді

ҚОСТАНАЙ. 28 сәуір. Қостанай облысы Қарабалық аудандық соты кәсіпкердің аудан әкімінің орынбасары Алмас Сұлтановтан моральдық зияны үшін 1 теңге өтемақы өндіру талабын қанағаттандырды. Сот шешіміне шенеунік  келіспейтінін білдіріп, арызданды.  Бұл туралы alau.kz хабарлады. Сұлтанов аудандық балалар кітапханасына жөндеу жұмыстарының жүргізілуіне жетекшілік етті. Оның үстінен сотқа арызданған кәсіпкер  жөндеу жұмыстарын жүргізеді.  Оқиға өткен жылдың  7 маусымында болады. Куратор мен мердігер кітапхана ғимаратының алдында сөйлесіп тұрады.  Азаматтық соттың материалдарында айтылғандай, мердігермен келіспей қалған  Сұлтанов көңіл күй еркіне беріліп,  кәсіпкерді жағасынан алады да, оны былапыттап,  ғимараттың алдына сүйреп әкеледі.  Кәсіпкердің ары мен ұжданы аяққа тапталады. Сотта кәсіпкер мұны куәгерлермен дәлелдейді. Аудандық сот  Алмас Сұлтановтан  жеке кәсіпкер Хогаевқа моральдық нұқсан келтіргені үшін 1 теңге көлемінде өтемақы беруге қаулы шығарады.  Сот шешімі әлі күшіне енген жоқ.  Қазір Сұлтанов сот шешіміне наразылығын білдіріп, апелляциялық арыз берді. Нәзира Жәрімбетова. Дерек, сурет:  alau.kz