Бұрымды қыз

Бұл челлендж қазақ қыздарының әсем­дігі мен табиғи сұлу­лығын айқындайтын, сондай-ақ қазақтың бай мәдени мұрасын ұлықтауға арналған іс-шара ретінде танымал. Шаш – қазақ халқының дәс­түрінде ерекше маңызға ие. Оны тек сән үшін емес, ден­саулықтың, тазалықтың және сұлулықтың белгісі ре­тінде қадірлейді. Со­нымен қатар бұл қазақ мә­дениетінің жаң­ғыруы мен жас буынға оның маңыздылығын жеткізу тәсілі екені анық.

Қазіргі кезде жаһандану үрдісінде көптеген жастар ұлттық құндылықты елемей, Батыс мәдениетіне ауытқуда. мектеп жасындағы қыздар жас шыбық тәрізді, оның түзу болып өсуі отбасы мен мектепте алған тәрбиесіне тікелей байланысты. Жастардың, әсіресе мектеп оқушыларының  ұлттық құндылықтарға бет бұруына көмектесетін мұндай бастама ұлттың болашағы үшін өте маңызды.

«Алғаш рет 2023–2024 оқу жылында барлық білім ұйым­дарында еліміздің жал­пы­­адамзаттық және ұлттық құн­дылықтарға негізделген сая­саты көрініс тапқан  «Біртұтас тәрбие» бағдарламасы енгізілді. Бағдарламаның мақсаты – жал­пы­адамзаттық және ұлт­тық құндылық негізінде саналы азамат тәрбиелеу. Облы­сымызда  да аталған бағдарлама өз дең­гейінде атқарылуда. Соның бір дәлелі, оқу жылы басталысымен Алматы облысы білім басқармасына қа­расты барлық орта білім беру ұйым­дарында ұлттық құндылық­ты дәріптейтін «Бұ­рымды қыз» челленджі бас­тау алды. Түпкі мәні қазақ қызының бейнесін сақтауға бағытталған. Сонымен қатар бұл акция қыздарға өзін-өзі қадірлеу мен сұлулығын бағалауды үйре­теді», – дейді облыстық білім бас­қармасының баспасөз қыз­меткері Ардақ Асылбаева.     

Аталған челленджді өңірдің барлық мектептері бір-бірінен қабыл алып,  көркіне ақылы сай бұрымдылар қатысып жатыр.

Алматы облысы