Ақмола облысында басқарма басшысы тағайындалды

КӨКШЕТАУ. 28 сәуір. Ақмола облысы әкімінің осы жылдың 27 сәуіріндегі қаулысымен Құлышева Гүлнар Ержейқызы Ақмола облысының денсаулық сақтау басқармасының басшысы қызметіне тағайындалды. Бұл туралы egemen.kz хабарлады. Гүлнар Ержейқызы 1972 жылы туған. Қарағанды мемлекеттік медициналық институтын бітірген. Медицина ғылымдарының кандидаты. Ол өзінің еңбек жолын 1995 жылы Жезқазған облысының Жезді аудандық ауруханасының инфекционист-дәрігері ретінде бастаған. Гүлнәр Құлышева көп жылдық кәсіби тәжірибеден өтті. 2003 жылдың тамыз айынан 2004 жылдың ақпан айына дейін – Ақмола облысының Қызыл Жарты ай қоғамында дәрігерлік бағдарламалардың үйлестірушісі, 2004 жылдың ақпан айынан 2010 жылдың қаңтар айына дейін Ақмола облыстық салауатты өмір салтын қалыптастыру орталығының басшысы қызметтерін атқарған. Жаңа қызметке тағайындалғанға дейін «Астана қаласының мамандандырылған сәбилер үйі» мемлекеттік мекемесінің бас дәрігері болып еңбек етті. Бақберген Амалбек. Дерек, сурет: egemen.kz.