«Кәсібімді кеңейтуді көптен ойлап жүргенмін. Бірақ қаржы тапшылығы қолбайлау болды. «Ауыл аманаты» бағдарламасының жүзеге асуы қолымды ұзартты. Қолыма тиген 8 млн теңгеге бизнес-жоспарымда көрсетілген үлкен пеш, кондитерлік арнайы үстелдер мен тоңазытқыш сияқты ең қажетті құрал-жабдықтарды шетелден тапсырыспен сатып алдым. Мемлекет тарапынан осындай мүмкіндіктің болып жатқаны қуантады», дейді Аманкелді Көжебаев.
Айтуынша, өніміне тұрақты сұраныс бар. Сондай-ақ кәсібін кеңейтудің нәтижесінде жұмысшы қатары көбейген. Бастапқыда 4 адаммен жұмысын бастаған кондитерлік цехта бүгінде 10 адам еселі еңбек етеді.
Цехқа келген жұмысшылар алдымен сынақ мерзімінен өтеді. Толық үйреніп, бейімділігін байқатады. Кәсібі ұнап, әрі қарай жұмысын жалғастыруға ниетті болса, ресми түрде құжатпен жұмысқа қабылдайды.
«Ауылда еңбек еткісі келетін адам аз емес. Егер алдағы уақытта бұдан да жоғары деңгейде дамитын болсақ, еңбек адамдарының табысы артып, тұрмысы да жақсарады», дейді кәсіпкер.
Ауылдастарының әлеуметтік-тұрмыстық жағдайының жақсы болуын қалайтын арда азамат келешекте жұмысшы санын 30-40-қа жеткізуді ойластырып отыр.
Ауылдағы ағайынның қам-қарекетін күйттейтін «Ауыл аманаты» бағдарламасы жылдық 2,5 пайыз сыйақы мөлшерлемесімен 5 жылға дейінгі мерзімге шағын несие беруді көздейді. Мал шаруашылығы саласындағы жобалар үшін шағын несие мерзімі – 7 жыл. Шағын несиенің ең жоғары сомасы – 2,5 мың айлық есептік көрсеткіш (2024 жылы – 9,2 млн теңге), ауыл шаруашылығы кооперативтерін дамыту үшін – 8 мың АЕК (2024 жылы – 29,5 млн теңге).
Әр өңірдегі сенім білдірілген өкіл болып саналатын әлеуметтік-кәсіпкерлік корпорация бағдарлама қатысушыларының неғұрлым жеңілдетілген шағын несиеге қол жеткізуіне көмек береді.
Алматы облысы
