Суретті түсірген – Ерлан ОМАР, «EQ»
Дауыс беруге келген ел ағаларының бірі, жазушы-журналист Сайлау Көшкенді осы жерде жолықтырдық.
– Атом электр стансасын салу туралы әңгіме қозғалғаннан бері бұқаралық ақпарат құралдарын үзбей оқып келемін. Әсіресе «Egemen Qazaqstan» бетінде білікті мамандар салиқалы пікір айтып, болашақ стансаның қаншалықты қажет екенін, бұл сауалдың мәні мен мазмұнын жан-жақты талқылап жазды. Тақырыпты тереңнен толғап саралаған мамандардың айтуына қарағанда, бұл – еліміздің ертеңіне мейлінше зор ықпал ететін шаруа. Электр қуатынсыз қоғамның болашағын көз алдыңа елестете алмайсың. Өзімнің азаматтық міндетімді өтейін деп таңғы сағат алты жарымнан дауыс беру учаскесіне келдім. Учаске жұмысы басталғанша аздап күтуге тура келді, – дейді С.Көшкен.
Учаскеге 2 741 адам тіркелген. Сағат 10-да 150-ге жуық адам дауыс беріп үлгерді. Сәлден кейін адамдар легі көбейді, кішігірім кезек те пайда болды. Осы бір көрініске қарап жерлестеріміздің ел ертеңіне бейжай қарамайтынын аңғаруға болады.
– Дауыс берушілер арасында аға буын өкілдері де, жастар да бар. Егде адамдар таңсәріден келіп дауыс берді. Олардың арасында жасы 80-нен асқан бірнеше қарт та бар. Ең бірінші келген адамдарға сый-сияпатымызды жасадық. Аға буын ел болашағы үшін атқаратын шаруаны жақсы түсінеді. Ал 18-ге жаңа толып жатқан жастардың ел ертеңіне деген алаңдаушылығын, бойындағы жауапкершілігін көрген кезде ризашылық сезімге бөленеді екенсің, – дейді учаскелік комиссияның төрайымы Қарлығаш Тінахина.
Учаскенің алдына азаматтық міндетін өтеуге келген адамдармен де тілдестік. Мамандандырылған күзет қызметінің өкілі Ерболат Құсметов ертеңгі ұпақтың алдында жауапты екенін жеткізді.
Ақмола облыстық референдум комиссиясының төрағасы Манарбек Сәдуовтің айтуына қарағанда, өңірде 513 254 дауыс беруші бар. Сағат 10-ға дейін олардың 17,18 пайызы дауыс беріп үлгерген.
Ақмола облысы
