Ақтөбеде кадр комиссиясының отырысы өтті

АҚТӨБЕ. 28 қаңтар. Ақтөбе облысының әкімі Архимед Мұхамбетовтің төрағалық етуімен өткен кадр комиссиясының отырысында «А» корпусының мемлекеттік әкімшілік қызметінің кадр резервіне үміткерлермен әңгімелесу  болып өтті. Бұл туралы egemen.kz тілшісі хабарлады. Президент жанындағы кадр саясаты жөніндегі ұлттық комиссия өткен жылдың желтоқсан айында «А» корпусы кадр резервіне іріктеу  жариялаған болатын. Соған сәйкес Ақтөбе облысынан 20 үміткер құжаттарын тапсырған-ды. Биылғы қаңтар айының орта тұсында Астанада өткізілген тестілеудің нәтижесінде он үміткер сынақтың шекті мәнінен жоғары нәтиже көрсетті. Облыстық кадр комиссиясының отырысында он үміткерге үш блок бойынша алдын ала дайындалған сұрақтар ұсынылып, әңгімелесу өткізілді. Комиссия мүшелері үміткер, оның қазіргі қызметіндегі лауазымдық міндеттерінің сипаты, негізгі жетістіктері жөнінде ақпарат алып қана қоймай, қоғамдық қызметке қатысуын, сондай-ақ мемлекеттік қоғамдық-саяси құрылымды білу, даму стратегиясын байыптау деңгейін анықтады. Сонымен бірге, үміткерлердің «А» корпусының кадр резервіне кіру себептері мен ұғынуы, мемлекеттік қызметтің қоғам, мемлекет үшін маңыздылығын түсінуі, мемлекеттік қызметкерге қойылатын талаптар, талаптанушының этика мен құндылықтар бағдары, олардың ұйымдастырушылық, көшбасшылық қабілет-қарымдары, мінез-құлқы сарапқа салынды. Комиссия отырысына Президент Әкімшілігінің мемлекеттік инспекторы Шалқар Байбеков қатысты. Кадр комиссиясының жұмысын қорытындылай келе Архимед Мұхамбетов үміткерлерге алға қойған мақсаттарына жетуге тілек білдірді. Сатыбалды Сәуірбай. Дерек: egemen.kz. Сурет: aktobe.gov.kz.