28 Қаңтар, 2015

Ақтөбедегі жасөспірімдер кітапханасы жаңа ғимаратқа қоныс аударды

604 рет
көрсетілді
1 мин
оқу үшін
28 01 - kitaphana АҚТӨБЕ. 28 қаңтар. Ақтөбеде С.Жиенбаев атындағы облыстық жасөспірімдер кітапханасы жаңа ғимаратқа қоныс аударды. Бұл туралы egemen.kz тілшісі хабарлады. Нысанның ашылуына облыстағы зиялы қауым өкілдері мен оқырмандар қатысты. Аталған кітапхана 1979 жылы құрылып, оған 2000 жылы ақын Сағи Жиенбаевтың есімі берілді.  Сексен мыңға жуық кітап қоры бар кітапхана осы уақытқа дейін «Алақай» қуыршақ театрының ғимаратында орналасып келген болатын. Облыс әкімдігі мен  облыстық мәдениет, мұрағаттар және құжаттама басқармасының тарапынан қолдау көрсетіліп,  Прохоров көшесінің бойындағы бұған дейін Зауыт полиция бөлімшесі болып келген ескі нысан кітапхана меншігіне берілді. Өткен жылы республикалық бюджеттен 47 миллион теңге бөлініп, ғимараттың іші, сырты қайта жаңарды. Жаңарған нысан кітаптарды сақтауға, оқырмандарға сапалы  қызмет көрсетуге және кітапхана қызметкерлерінің еркін жұмыс істеуіне өте қолайлы. Оқырмандар үшін де барлық жағдай жасалған. Мүмкіндігі шектеулі жандар үшін арнайы пандус орнатылған.   Облыстық мәдениет, мұрағаттар және құжаттама басқармасы тарапынан кітапхананың материалдық-техникалық базасын нығайту үшін бір миллион теңге бөлінген. Кітапханада абонемент, оқу залы, инновациялық және әдістемелік жұмыс бөлімі, интернет зал, құжаттарды жинақтау, өңдеу, каталогтарды ұйымдастыру және өнер жөніндегі әдебиеттер бөлімі жұмыс істейді. Кітап қорын электронды нұсқаға ауыстыру жұмыстары да жүйелі жүргізілуде. Сатыбалды Сәуірбай. Дерек: egemen.kz. Сурет: aktobe.gov.kz.