Ақтөбеде «Қару» акциясының бірінші күні 32 құқық бұзушылық анықталды

АҚТӨБЕ. 28 қаңтар. Облыстағы жедел жағдайды сауықтыру, атыс қаруын, жарылғыш заттарды қолдану арқылы жасалатын қылмыстарды ашу және ескерту мақсатында үстіміздегі жылғы 26 қаңтар мен 20 ақпан аралығында облыстық ішкі істер департаменті «Қару» жедел-профилактикалық іс-шарасын өткізуде. Бұл туралы egemen.kz тілшісі хабарлады. Акция барысында заңсыз айналымдағы атыс қаруларын, оқ-дәрілерді, жарылғыш заттарды, тіркелмеген қаруларды анықтау және алу жүзеге асырылуда. Сонымен қатар, қалада, елді мекендерде, ауыл аймақтарда, сондай-ақ жеке қожалықтарда азаматтардан  заңсыз айналымнан атыс қаруларын, оқ-дәрілерді, жарылғыш заттарды анықтау және алу рейдтік іс-шаралары жүргізіліп жатыр. Қару иелері тұрғылықты жері бойынша тексеріліп, олардың қаруды пайдалану, ұстау және сақтау талаптарын орындауы тексерілуде. «Қару» жедел-профилактикалық іс-шарасының бірінші күні ақтөбелік полицейлер 32 әкімшілік құқық бұзушылықты анықтады, оның ішінде 23-і азаматтық қаруды сақтау мерзімін және ережесін бұзғандар, 8-і азаматтық қаруды тіркеу (қайта тіркеу) тәртібін бұзған, 1-і азаматтық қаруды заңсыз сақтаған. Барлық анықталған деректер бойынша заң талаптары мүлтіксіз орындалып, құқық бұзушылардан қарулар мен оқ-дәрілер тәркіленіп әкімшілік жауапкершілікке тартылды. Акция жалғасуда. Сатыбалды Сәуірбай. Дерек: egemen.kz. Сурет: cripo.com.