Семей қалалық мәдениет сарайындағы №84 учаскелік референдум комиссиясының төрағасы Айнұр Мұратқанның айтуынша, аталған аумақта 1 мыңнан аса адам дауыс берген.
– Біздің учаскеде алғаш рет 50 жас азамат дауыс берді. Оларға референдум комиссиясы мүшелері естелік сыйлық табыс етті. Сонымен қатар учаскеде тіркелген дауыс берушілердің ішінде 52 сайлаушы өздерінің үй-жайларында таңдауын жасады, – дейді А.Мұратханқызы.
Қоғамдық көліктер тұрғындар мен меймандарды тегін тасымалдады. Учаскелерде мүмкіндігі шектеулі адамдарға арнайы тактильді көрсеткіштер, пандустар орнатылған. Учаскелерде ондай азаматтарға арналған кабиналар саны 110-ды құрап, 6 сурдоаудармашы мен 16 инвотакси көмек қолын созды.
Облыс орталығының шетіндегі Восход кентінің тұрғындары №108 учаскеде дауыс берді.
«Кәмелеттік жасқа толып, алғаш рет референдумға қатысқандар – 4 адам. Ал таңғы 9.00-ден бастап учаскедегі референдум комиссиясының мүшелері үй-үйді аралап, ақ жаулықты аналар мен ақсақалдардың жалпыұлттық науқаннан шет қалмауына жағдай жасады», дейді референдум комиссиясының төрағасы Жанна Даукенқызы.
Қырық жылдан аса ауыл шаруашылығы саласында аянбай еңбек еткен 80 жастағы Мейрамхан Шынаров ақсақал комиссия мүшелерін ықыласпен қарсы алыпты. Зайыбымен бірге өз шаңырағынан дауыс беруге өтініш білдірген олар елдегі өзгерісті, әділеттілікті қолдайтынын жеткізді.
Абай облысы
