Орманшылар ерлігіне ескерткіш

«Жамандық айтып келмейді» деген. Соңғы жылдары еліміздің әр өңірінде болған өрт пен тас­қын су апаты кезіндегі түрлі қиын­­дық халқымызды сынады. Бір­лі­гі­міз­ді арттырды. Өмір мен өлім ар­­­палы­сындағы қасиетімізді шыңдады.

«Семей орманы» резерватына қарасты Бородулиха ауданы Камышенка орман шаруа­шылығының жанында қызмет­тік боры­шын орындау кезінде ғұмыры үзіл­ген орманшыларға арнал­ған ескерткіштің авторы – талантты мү­сінші, осы­ған дейін елімізге та­нымал тұлғалар­дың бейнесін сомдаған Нұрбол Қалиев. Орманшылардың ерлігін әспеттеген мүсіннің биіктігі – гранит тұғырымен қоса есептеген­де 8 метр. Бұ­ған қоса қоладан жа­сал­ған ескерт­кіш қаза тапқандар­­дың батыл­дығы мен өз істеріне адал­дығын бейнелейтін рельефтер­мен безендірілген. 

«Бір ескерткішпен бір­аз нәрсе айтуға болатынын ескерсек, осы жұмыс ар­қылы орман өрті кезінде қаза тапқандардың есімін ел жа­дында жаңғыртып, келешек ұрпаққа кең көлемде насихаттай аламыз. Биылғы жылы сәуір айында бас­талған шығармашылық жұмыстың нәти­жесінде ел үшін басын бәй­геге тіккен бүгінгінің ба­тыр­­ларын ұлықтау парыз бол­­ды», дейді мүсінші Н.Қа­лиев.

Ескерткіштің салтанатты ашылу рәсімінде опат болған орманшыларды бір минут үнсіздікпен еске алды. Облыс әкімі Нұрлан Ұранхаев жерлестеріміздің ерлігі тек осы өңір­дің ғана емес, барша отандасымыз мақтанатын құбылыс екенін жеткізді.

«Қара орманды қадірлеп, ерлік пен өрліктің жарқын үлгісін көрсеткендер ұрпақ жадында мәңгі сақталады. Бұл тұғыртас табиғаттың то­сын мінезіне төтеп берген азамат­тардың атын әйгілеу үшін арнайы қойылып отыр. Есімдері тарих тақтасына ал­тын әріп­пен жазылып, ұр­пағы мақтан етер жерлес­терімізге, біз, қашанда басы­мызды иеміз», деді өңір басшысы.

Қаза болған орманшының туысы Арай Әмірханова ашыл­ған ескерткіштің мар­құм­дарға көрсетілген зор құр­мет екенін атап өтті. Соны­мен қатар сонау қайғылы күндерден бастап жан жарынан, ұлынан, аға-бауырынан айырыл­ған жандардың мемлекет тарапынан көрсетілген қолдауды терең сезінгенін мәлім етті.

Өткен жылы маусым айында болған қайғылы оқиға мезетінде Мем­лекет басшысы Қасым-Жомарт Тоқаев Абай облысына арнайы келіп, қыз­метін атқару кезінде көз жұмғандардың есімі елеусіз қал­майтынын айтқан еді. Бой көтеріп отырған еңселі ескерт­кіш те елдіктің нышаны ретінде бейбіт заман ба­тырларының есімін жұрт жадында жаң­ғыртты.

Абай облысы