Жоғарыда аталған командалардың екеуінің де бағындырған белесі қомақты. Тарқатып айтсақ, Бразилия – әлемнің бес дүркін чемпионы (1989, 1992, 1996, 2008, 2012 жылдары), күміс (2000), қола (2004, 2021) жүлдегері. Дәл осындай табысымен жер-жаһандағы бірде-бір мемлекеттің өкілі мақтана алмайды. Аргентина соңғы екі дүниежүзілік доп додасының финалында ойнады. 2016 жылы олар алдына жан салмаса, 2021 жылы шешуші сайыста сүрінді.
Ташкентте бұл командалар барлық қарсыласын қапы қалдырып, финалға 100 пайыздық көрсеткішпен жетті. Топтық турнирде Куба (10:0), Хорватия (8:1), Таиландты (9:1) тізе бүктірген бразилиялықтар плей-оффта Коста-Рика (5:0), Марокко (3:1), Украинаны (3:2) ұтты. Ал Аргентина бастапқы кезеңде Украина (7:1), Ауғанстан (7:2), Анголадан (9:5) айласын асырып, 1/8 финалда Хорватиядан (2:0), ширек финалда Қазақстаннан (6:1), жартылай финалда Франциядан (3:2) басым түсті.
Финалдық сында алғашқы екі допты Бразилияның футзалшылары қақпаға енгізді. 6-минутта «Семейдің» сапында өнер көрсетіп жүрген Фераро есеп ашса, 13-минутта Рафаэль екінші голды соқты. Үзілістен кейін қос команда ұзақ уақыт бойы бір-бірінің қақпа кілтін таба алмады. Тек матчтың аяқталуына бір минуттай уақыт қалғанда Маттиас Себастьян Роса есеп айырмашылығын қысқартты – 2:1. Сөйтіп, Бразилия құрамасы әлемнің алты дүркін чемпионы атанды.
Қола медальды Украинаның футзалшылары иеленді. Үшінші орынға тартыста олар Францияның тас-талқанын шығарды – 7:1. Голдардың авторлары – Игорь Чернявский (11-минут), Михайл Зварыч (22), Евгений Жук (27, 28), Даниил Абакшин (30, 30, 33) – Айюб Саадауи (23). Бұл – аталған команданың әлем чемпионатында алғаш рет атой салуы. 1996 жылы украиналықтар шешуші тұста Ресейге есе жіберіп, төртінші орында қалып қойған еді. Міне, енді, Киевтен келген жігіттер жүлдегерлер санатына қосылды. Ал Франция болса, өз тарихында алғаш рет жартылай финалда ойнады.
Өзбекстанның астанасында Қазақстан құрамасы да өте жақсы өнер көрсетті. Топтық турнирде Ливия (4:1) мен Жаңа Зеландияны (10:0) жеңіп, әлемдік додада алты рет жеңіс тұғырына көтерілген азулы Испаниямен (2 алтын, 3 күміс, 1 қола) тең түстік. 1/8 финалда соңғы әлем чемпионы Португалияны (2:1) жолымыздан ығыстырдық. Бірақ ширек финалда жерлестерімізді Аргентина (1:6) тоқтатты.
