«Қазақстандық атом электр стансалары» ЖШС жоғары сынып оқушылары арасында қызықты ғылыми ойын ұйымдастырды. Ондағы мақсат ғылымның болашағы зор саласы – ядролық физика мен атом энергетикасы туралы жастарды хабардар ету. Сондай-ақ ғылым мен білім, техника мен заманауи технологияға деген қызығушылықты арттыру мақсатымен «XXI ғасыр көшбасшысы» телешоуы форматымен «Атом данышпаны» интеллектуалды ойынын ұсынды. «Жүйріктен жүйрік озар жарысқанда» демекші, осы бағытта сынға түсіп іріктелген елорданың ең зерделі 6 оқушысы өз білімін сарапқа салды.
«Атом данышпаны» интеллектуалды ойынының сәтті өткеніне қуаныштымыз. Қатысушылардың дайындық деңгейі таңғалдырады. Бұл жастар арасында атом энергетикасына деген қызығушылықтың артып келе жатқанын аңғартса керек. Бұған қарап, саланың болашағы сенімді қолда екеніне көз жеткіздік», деді қазылар алқасының мүшесі, «Қазақстан атом электр стансалары» ЖШС бас директоры Тимур Жантикин.
Энергетика министрлігі «Атом энергетикасы және өнеркәсіп» департаментінің директоры Ғұмар Серғазиннің айтуынша, мұндай іс-шара өскелең ұрпақтың ғылымға деген қызығушылығын арттырып, осы саланың дамуына зор септігін тигізеді. Сондықтан бұл интеллектуалды ойынды жыл сайын дәстүрлі түрде өткізуді жоспарлаған.
«Өрені өсіріп, ой-өрісіңді кеңейтетін интеллектуалды ойынға қатысу маған үлкен тәжірибе болды. Мен бүгін ядролық энергия тек радиацияға ғана емес, еліміздің жалпы болашақ дамуына да тікелей қатысы бар екеніне көз жеткіздім. Бұл мені осы саланы тереңірек зерттеуге шабыттандырды», деді ойынға қатысушы Жанель Науфилова.
Іс-шара соңында қатысушылар ойын серіктесі «Қазатомөнеркәсіп» ҰАК» АҚ бағалы сыйлықтарымен марапатталды. Бас жүлдені «Зерде» мектебінің 9-сынып оқушысы Белқожа Аспет жеңіп алып, «Атом данышпаны» атанды. Жас атом данышпанына «Ядролық физика институты» РМК тарапынан Астана филиалында ғылыми тағылымдамадан өтуге арнайы жолдама берілді. Одан бөлек, барлық қатысушылар Курчатов қаласындағы «Ұлттық ядролық орталыққа» барып инженерлер жұмысымен танысады.
Білім бәйгесінің бас жүлдегері физика ғылымына, оның құдіретті тармағының бірі – атом энергетикасына ден қойғанына бірнеше жыл өткенін айтты. «Болашақтың сенімді энергия көзі, сарқылмас қуат күші – атом энергетикасы. Елімізде уран қоры мол. Соны біліктілікпен ең биік деңгейіне дейін игеріп, халық қажетіне тиімді жаратуды білуіміз керек», деді жас физиктердің ең білгірі.
«ҚАЭС» ЖШС елде АЭС салу бойынша жұмысты ұйымдастыру мен оны жобалау алдындағы, сондай-ақ жобалау құжаттамасын әзірлеуді қамтамасыз ету мақсатында құрылған. Бұлармен бірге, атом өнеркәсібі мен атом энергетикасы нысандары архитектурасын дамыту, оларға инженерлік зерттеулерді әзірлеу, салада техникалық кеңес беру, атом энергиясын бейбіт мақсатта пайдаланудағы ғылыми тұжырымдар мен тәжірибелік әзірлемелер дайындайды.
