Қарқынды дамып, көркі келісе бастаған ауылдың салтанатты реңі көз қызықтырарлық. Мол қаражаттың есебінен медициналық орталық, тігін цехы, көпбейінді кешен салынып, ауыл тұрғындарына қалтқысыз қызмет етіп тұр. Басы ауырып, балтыры сыздағандарға қызмет ететін заманауи медициналық орталықта қажетті құрал-жабдықтармен қамтамасыз етілген емдеу, рентген кабинеттері және күндізгі стационар бар. Адамдар енді сабылып алысқа бармай-ақ, осы жердің өзінде сапалы ем қабылдай алады.
Ал медициналық киім тігетін цехтың ашылуы ондаған жұмыс орнын құрып, адамдардың тұрақты жұмыспен қамтылуына тәп-тәуір септігін тигізіп отыр. Бір ауысымда 500 киімге дейін тіге алады.
Туған ауылының түтінін түзу ұшыруға бел буа кірісіп, бірталай іргелі іс атқарып тастаған кәсіпкер заманауи супермаркет, білім және шығармашылық орталық орналасқан кешен салды. Қазір орталыққа 200-ге жуық бала барады. Ел ертеңі санатындағы жасөспірімдер рухани қазынаның орталығына айналған кешендегі би, спорт, көркемөнерпаздар үйірмелеріне қатысып, шахмат, дойбы ойнайды. Осы арада дәл осындай қамқорлық бар жердегі ауыл балаларының қала балаларынан сынық сүйем кем қалмай, дамып, жан-жақты өсуіне мол мүмкіндік туындап отырғандығын екпін түсіріп айта кетсек, артық болмас. Осындай жағдайға жету кәсіпкер қамқорлығының арқасында мүмкін болып отыр.
Алдағы уақытта да көркі келіскен Қызылжар ауылы жан-жақты дамып, кемелдене түспек. Елді мекенде фитнес орталығы, монша, сауықтыру кешені, дәмхана, наубайхана, медицина қызметкерлеріне арналған көппәтерлі тұрғын үй кешені салынып жатыр. Осының барлығы толық жүзеге асқан кезде ауыл жер бетіндегі жұмақ іспетті ыстық ұяға айналмақ. Бұл істің тәрбиелік те мәні бар. Ауылға жаны ашитын азаматтың қаншалықты еңбегін сіңіріп жатқанын көзімен көрген жас толқын да ертең алдыңғы буын ағалардың ізімен жүріп, дарқан дала төсінде өздерінің өнегелі ізін салары сөзсіз.
«Мельс» серіктестігінің бас директоры Ерлан Сүлейменов алдағы уақытта кәсіби техникалық колледж, 150 орындық балабақша, жұмысшыларға арналған жатақхана, кинотеатры бар мәдениет үйі, ұлттық нақыштағы қонақүй кешенін салмақ. Осындай сәулетті ғимараттар архитектуралық үйлесіммен бой көтерген кезде Қызылжар аспанындағы жұлдыздар да ынтымағы жарасқан іргелі елдің үстіне сүйіспеншілік сәулесін құйып тұрары даусыз.
Кәсіпкер дәрілік препараттарды қайта өңдейтін фабрика құрылысын бастауды да жоспарлап қойған. Ойға алған шаруасы оңынан оңғарылса, ауылда қаншама жұмыс орны ашылып, әлеуметтік-тұрмыстық жағдай оңала түспек. Ауыл инфрақұрылымын одан әрі дамыту мақсатында бес сатылы тазартумен кәріз-тазарту құрылыстары да қолға алынбақ. Осылайша, тірек ауылдардың біріне айналған Қызылжар болашақ кеңістігіне еркін енетін еңселі елдің қатарына кіреді. Осының барлығы ел игілігіне айналып жатқан инвестицияның сыбағасы.
Ақмола облысы,
Целиноград ауданы
