Фото: arnapress.kz
Облыстық Төтенше жағдайлар департаментінің хабарлауынша, қаза тапқан балалар 2016, 2018, 2019, 2022, 2023 жылы туған. Үйде қараусыз қалған балалардың ішінде 2011 жылы туған жасөспірім ғана аман қалған.
«Бүгін сағат 04:29-да Жітіқара қаласындағы жеке шаруа қожалығының аумағында өрт шығып, салдарынан тұрғын үйдің шатыры опырылып түсті. Құтқарушылар оқиға орнына 7 минут ішінде жетті, үй толығымен өртке оранды. Жалын сағат 06:08-де ауыздықталып, толығымен сөндірілді. Алдын ала мәлімет бойынша, балалардың анасы кешкісін танысына кеткен. Күйеуі түрмеде отыр», делінген облыстық ТЖД хабарламасында.
Облыстық прокуратура өрт пештің ашық қалуынан болуы мүмкін екенін мәлімдеді. Ал жергілікті атқарушы орган марқұмдардың туыстарына қажетті көмек көрсетілетінін жеткізді.
ТЖД мамандары өрттің нақты себебін анықтау үшін өрт-техникалық зерттеу жүргізеді.
