Жергілікті өлкетанушыларымыз майдангерлердің ерліктері мен есімдерін ұтытылмастай есте қалдыру үшін біраз жылдан бері іздеу-зерттеу жұмыстарын жүргізіп келеді. Бұл шараның арқасында ауданымызда екінші дүниежүзілік соғысқа бастан-аяқ, яғни 1939 жылдан 1946 жылға дейін қатысқан жауынгер анықталған болатын. Оның, сондай-ақ, Қиыр Шығыстан бастап Батыс майдандарында да оқ пен оттың ортасынан өткені бүгінде көпшілікке мәлім болып отыр. Туған жерге аман-есен оралып, бейбіт еңбекте де көзге түскен марқұм Смағұл Шалқарбековтің атына Қараағаш ауылында көше берілуіне тұрғындар тілегі бар.
Смекеңнің әкесі Шалқарбек те жұртқа сыйлы болған кісі еді. Ашаршылық жылдарында орманның құсы мен даланың киігін атып, ауылдастарын асырап шыққаны ел аузынан кетпейтін әңгіме. Арғы бабасы Нұрбай батырдың қазақ жерін қорғаудағы ерліктері ұрпақтан-ұрпаққа жетіп отыр.
Оның 7 жылға ұласқан майдан жолдары Моңғолиядағы атақты Хасан көлі шайқасынан басталады. Сол кезде 20 жасар жігіт ысылған, тәжірибелі жауынгер ретінде Мәскеуді қорғауға жеткізілген қаруластары қатарында жауды кейін шегіндіруге қатысып, одан Украинаны, Румынияны, Венгрияны, Австрияны азат етуге атсалысады. Екі рет «Ерлігі үшін» , «Белградты азат еткені үшін», «Германияны жеңгені үшін» медальдарымен және І, ІІ дәрежелі «Ұлы Отан соғысы» орденімен марапатталуы ер жауынгер болуының айғағы екені даусыз.
Соғыс туралы көп айта қоймайтын, оны еске алуға жаны ауырсынатын майдангердің өмір мен өлім белдескен жылдардағы ерліктері жайында жинақталған жаңа мәліметтер аудандық мұражайға қойылды. Одан кескілескен қанды шайқастарда небір қиындықтар мен тауқыметтерге төзе біліп, жауынгерлік парызға болаттай берік болған кісі бейнесі көз алдымызға келеді. Өз ауылындағы мектеп оқушыларының батыр аталарына арналған ескерткіш мүйіс ашуды ойластыруы ризалық туғызады. Мұндай шараларға аудандық ардагерлер кеңесі мұрындық болып отыр. Аға ұрпақ ерліктері ешқашан ұмытылмауға тиіс.
Қамбар СЕЙІТҚАМАЛОВ,
Жаңаарқа аудандық ардагерлер кеңесінің төрағасы.
Қарағанды облысы.
