Сурет: kolesa.kz
Облыстық энергетика және тұрғын үй-коммуналдық шаруашылығы басқармасының басшысы Мирас Мүлкәй өңірлік коммуникациялар қызметі алаңында өткен брифингте өңірде қалыптасқан жағдайға түсінік берді. Батыс Қазақстан облысының ішкі нарығына сұйытылған мұнай газын жеткізумен 19 нысан айналысады. Облыс аумағында жалпы саны 109 газ құю стансасы бар. Өңірдің орташа айлық сұйытылған газды тұтыну мөлшері – 4000-4500 тонна.
Батыс Қазақстан облысына төртінші тоқсанда 11 566 тонна сұйытылған мұнай газын жеткізу жоспарланған екен. Соның ішінде қазан айында – 3510 тонна, қарашада – 4030 тонна, желтоқсан айында 4026 тонна жеткізу көзделген. Алайда 14 қараша күнгі жағдайға қарағанда «Жайықмұнай» ЖШС қазан айындағы жоспарын небәрі 41% орындап, 1442 тонна ғана газ берген.
– 1-25 қазан аралығында Атырау мұнай өңдеу зауыты уақытша жөндеуге жабылды. Осыған байланысты Энергетика министрлігі Атырау облысына қажетті газ көлемінің бір бөлігін, яғни 2490 тонна өнімді «Жайықмұнай» компаниясынан алуға шешім шығарған. Ал бұл компания тәулігіне 220 тонна ғана сұйық газ жөнелте алады. Қазір осы газдың 120 тоннасы – Батыс Қазақстан облысына, 100 тоннасы – Атырау облысына жеткізіліп жатыр, – деп түсіндірді Мирас Мүлкәй.
Міне, өңірдегі газ тапшылығы, кейбір газ құю стансаларында талон пайда болғаны сондықтан екен. Бұған қоса, соңғы кезде өңірде сұйытылған газ отынымен жүретін көлік көбейіп кеткен. Полиция департаментінің мәліметінше, өткен жылы газ жабдығы орнатылған көлік саны 15 650 болса, бір жыл ішінде ол 30 пайызға артып, 22 432-ге жеткен.
«Осы оқиғалардың себебінен сұйытылған газ құю стансаларында кезек көбейіп, кей жерде талон пайда болды. Бірақ бұл уақытша жағдай. Қазір Энергетика министрлігі қосымша сұйытылған мұнай газының қажетті көлемін басқа көздерден бөлу мәселесін қарастырып жатыр», деді басқарма басшысы.
Батыс Қазақстан облысы
