Конференция барысында ұлтының қамын жеген ақын-қайраткердің қоғамдық-саяси, әдеби тұлғасына тереңнен тоқталып, көне көмбенің қойнауындағы талай сыр маржандай тізіліп, ақтарылды. Жас толқынға беймәлім тарихи шындық бар мән-мазмұнымен толайым өрнектеліп, көкіректерге нәр болып құйылды. Мемлекет және қоғам қайраткері, абзал азамат, аяулы ақын Сәкен Сейфуллин – қамшының сабындай қысқа ғұмырында кейінгі ұрпаққа өлшеусіз мол мәдени мұра қалдырған ерен тұлға. Әдебиеттің барлық жанрында қалам сілтеген жаңашыл ақын, көрнекті қаламгердің қаламынан туған көркем шығармалар өзінің шынайы сезімімен, көркем образдары, терең идеялары арқылы халқымыздың эстетикалық игілігін мейлінше байытты. Асылында Сәкен өз шығармалары арқылы қазақ әдебиетіне тұңғыш рет төңкерісшіл рух енгізді. Ақынның өлеңдері мен поэмаларында өзі өмір сүрген кезеңнің, дәуірдің, заманның образы, өзі де сол дәуірдің перзенті болғандықтан, асқақ пафоспен берілді. Ағартушылық, демократтық бағытта, сыншыл реализм әдісінің арнасында жазылған туындылары әлеуметтік-қоғамдық мазмұны, көркемдік-эстетикалық ерекшелігі, поэтикалық-ақындық қуаты қаламгердің табиғи үздік талантын, азаматтық позициясын, пәлсапалық дүниетанымын айқын байқатты.
Конференцияны жазушы-драматург Жабал Ерғалиев ашып, жүргізіп отырды. Облыс әкімінің орынбасары Алтынай Әміренова құттықтау сөз сөйлегеннен кейін мемлекет және қоғам қайраткері Оралбай Әбдікәрімов ақын туралы ақжарма лебізін білдіріп, тереңнен толғап сыр шертті. «Қазақ газеттері» серіктестігінің бас директоры, академик Дихан Қамзабекұлы сол дәуірдің тынысын, Алаш қайраткерлерінің басынан кешкен алмағайып заманы, сан қилы сезімдердің арбасуы туралы айта келіп, ақынның тар жол, тайғақ кешкен тағдыры туралы нақты деректерді келтіре отырып, көз алдымызға сол бір қиын да қияпат заманның тұтас кескінін келтірді. Қазақстанның еңбек сіңірген қайраткері, филология ғылымдарының докторы Серік Негимов кестелі көркем тілімен дауылпаз ақынның дара бейнесін жан-жақты сомдап берді. Тарих ғылымдарының докторы, Сәкен Сейфуллин музейінің басшысы Марат Әбсеметов ақынның қоғамдық-саяси жұмысы, әдеби шығармашылық, қаламгерлік өрісі туралы кеңінен толғады. Әдебиетші ғалым Сәбит Жәмбек ақынның шығармашылық келбетін көркем сөзбен кескіндеді.
Сәкен Сейфуллин ақын-жазушы ғана емес, қазақ жұрты үшін үлкен істер тындырған мемлекет және қоғам қайраткері. Халықшылдығымен дара, сондықтан, оның аяулы есімі жұртының жүрегінде. Қай заманда болсын ел мұндай перзентін әрдайым қастерлейді. Халықшыл қасиеті дауылпаз ақынды басқа қайраткерлерден ерекшелеп, тұлғасын даралап, бар сыр-сымбатымен тарих беттерінде жарқырап көрінуіне жол ашты.
Көкшетау
