Суретті түсірген – Ерлан ОМАР, «ЕQ»
Салтанатты іс-шараға Қорғаныс министрі Руслан Жақсылықов, Ақмола облысының әкімі Марат Ахметжанов, Рақымжан Қошқарбаевтың қызы Әлия Рақымжанқызы, Халық қаһарманы, отставкадағы армия генералы Мұхтар Алтынбаев, Халық қаһарманы, отставкадағы генерал-лейтенант Бақытжан Ертаев, «Qazaqstan ardagerleri» қауымдастығының төрағасы, ауған соғысының ардагері Бақытбек Смағұл, т.б. қонақтар қатысып, сөз сөйледі.
Олар Президент Қасым-Жомарт Тоқаевтың ұйытқы болуымен биыл туғанына 100 жыл толып отырған даңқты батырларымыз Р.Қошқарбаев пен С.Нұрмағамбетовтің мерейтойы кең көлемде тойланып жатқанын, сондай-ақ «Айбын» орденінің үш дәрежесіне Б.Момышұлы, С.Нұрмағамбетов және Р.Қошқарбаевтың есімдері берілгенін атап өтті.
«Бұл – көптен күткен мерейлі сәт. Рақымжан Қошқарбаев атындағы саябақ тайтөбеліктер мен ауыл қонақтарының сүйікті демалыс орнына айналады деп сенеміз. Мұндай қоғамдық орындар жас жеткіншектерімізге тарихтан тәлім беріп қана қоймай, оларды ел қорғайтын батыр қылып тәрбиелеуге өз үлесін қоспақ», деді облыс әкімі М.Ахметжанов.
Ә.Рақымжанқызы әкесінің мерейтойын өткізуге мемлекет тарапынан айрықша көңіл бөлініп жатқанына Президентке, облыс және Қорғаныс министрлігі басшыларына алғысын жеткізді.
«Әкемнің балалық шағы осы ауылда өтті. Бұл жер – біз үшін ыстық мекен. Бүгінгі саябақтың да Тайтөбенің төрінен ашылуы – заңдылық. Осы игілікті істің басы-қасында болып, жүзеге асуына атсалысқан барлық жанға рахмет айтқым келеді», деп ол жүрекжарды лебізін жеткізді.
Қосшы қалалық әкімдігі берген мәліметке қарағанда, 1 200 шаршы метр ауданды алып жатқан саябақ пен бюст жұмысына 70 млн теңге қаражат жұмсалған. Ішінде 8 орындық орнатылып, бүкіл аумағына тас төсеніш төселген. Айналасына қарағай ағаштары орнатылып, қоршалған. Саябақ аумағы толықтай жарықтандырылған. Бұл ауыл тұрғындары мен қонақтарына тек күндіз емес, қараңғы уақытта да саябақта серуендеуіне мүмкіндік береді.
Салтанатты іс-шара кезінде саябақ жанында қару-жарақ пен әскери техникалар көрмесі ұйымдастырылып, келушілерге сарбаз ботқасы ұсынылды.
Сонымен қатар батырдың 100 жылдығына орай елордадағы Ұлттық қорғаныс университетінде «Рейхстагқа ту тіккен Рақымжан Қошқарбаев» атты ведомствоаралық ғылыми-тәжірибелік конференция өтті. Оған Қарулы күштердің, басқа да әскери құрылымдардың өкілдері, профессор-оқытушылар құрамы, жоғары оқу орнының магистранттары мен докторанттары, тарихшылар, ардагерлер және Рақымжан Қошқарбаевтың туыстары қатысты.
Айта кетсек, 1945 жылы батыр жерлесіміз небәрі 20 жаста еді. Оның өмір жолы мен жасаған ерлігі – бүгінгі ұрпаққа үлгі-өнеге. Жиында отставкадағы генерал-лейтенант Абай Тасболатов Рақымжан Қошқарбаевты «феномен» деп атады. Ол өзінің өмірлік ұстанымы – қарапайымдылығымен, еңбекқорлығымен, сеніп тапсырылған іске жауапкершілігімен үлгі бола білді. Уақыт бәріне сыншы, қаһарман да тарихтан өз орнын алды.
Батырдың мерейтойына арналған тағы бір іс-шара елордадағы Р.Қошқарбаев атындағы №44 мектепте өтті. Оған Қорғаныс министрлігі Тәрбие және идеологиялық жұмыс департаменті басқармасының бастығы, полковник Серғали Әлімқұлов, «Amanat» партиясының өкілдері, Ауған соғысының ардагерлері, мұғалімдер мен оқушылар қатысты.
«Биыл мамыр айында Қорғаныс министрінің ұсынысымен бұл мектепке Рақымжан Қошқарбаевтың есімі берілді. Атаулы күнге орай министрлік іс-шаралар кешенін ұйымдастырып, барлық оқу орнында Ерлік сабақтары өтіп жатыр. Болашақ Отан қорғаушыларға өмір жолы үлгі болатын Р.Қошқарбаевтың ерлігі туралы айтылды», деп атап өтті полковник С.Әлімқұлов.
