Елдің еңбек қоғамына айналуы үшін дауыс бердім  

Мен – қарапайым еңбек адамымын. Бірақ жас кезімде елдің саяси өміріне араластым. Сондықтан қазір жас келсе де елдің саяси, экономикалық, әлеуметтік жағдайының барлығын қадағалап отырамын. Біздің елдегі сындарлы саясаттың арқасында Қазақстан бүгін­гідей зор дәрежеге жетті. Ай­наламыздағы мемлекеттердегі бейберекеттікті естіп, көріп отырып, өз елімдегі бауырмал тыныш­тық үшін тәубе етіп отырамын. Халықаралық жағдайдың қыл­пылдап, экономикалық дағдарыс бүкіл дүниені буып тұруына байланысты біздің елде де тындырылатын көп істің барлығын Елбасы айтқан болатын. Халқымыз «басшы дұрыс болмай, қос түзелмейді» дейді. Халық бекер айтпайды. Айналамызда мемлекет тізгінін ұстағандарды қуып шыққандарды да көрдік. Көреген, дана басшы ғана халқын қиын-қыстаудан алып шығады. Оның да куәсіміз. Сондықтан қиын кезде, алдымен Мемлекет басшысын таңдап алу керек болды. Біздегі кезектен тыс Президент сайлауы дер уақытындағы шешім екенінде дау жоқ. Мен Қостанай қаласындағы өзім дауыс беретін №31 сайлау учаскесіне түстен кейін бар­дым. Соның өзінде сайлаушы­лар легі толастамапты, лек-легімен келіп жатты. Айналайын, халқымның бірлігіне, Отанымыздың бола­шағын әркім өз бала-шағасының бола­шағы деп түсінген жауап­кер­шілігіне риза болдым. «Бірлік болмай, тірлік болмайды». Аталарымыз аттың жалында, түйенің қомында жүріп қорғап, тастап кеткен жерді түлету әр ұр­пақ­тың қасиетті парызы болмақ. Сол үшін еңбек ету керек. Еңбек болмаса адам азады, жер тозады. Мен зейнеткерлікке шыққанша трактордан түскен жоқпын. Балаларымды да еңбекке баулыдым. Бүгінгі сайлауда ұл-қыздарым, келіндерім мен күйеу балаларым, немерелерім – бір әулет болып дауыс бергенімізді мақтан тұтамын. Сайлауда мен елдің тыныш­тығы мен бірлігі үшін дауыс бердім, таңдауымды жасадым. Біз­дің елімізде еңбек ету үшін барлық жағдай жасалған, ең бас­тысы, алакөздік жоқ, бірлік, ұлт пен этностар арасындағы адами сыйластық бар. Тыныштық барда еткен еңбектің қайтарымы әманда болады. Мен дауыс беріп тұрып соны ойладым. Кәмшат ДӨНЕНБАЕВА, Социалистік Еңбек Ері. ҚОСТАНАЙ.