Жұмыс тобының шешімімен 21 қатысушының арасынан жартылай финалға 10 үміткер іріктелген. Олардың жобасы өңірлік бренд-комитет кеңесінде қаралып, 4 үздік жоба республикалық және халықаралық көрмелерге жолдама алды. Олар жобаның ережесіне сәйкес бизнесті бастау мен дамытуға 5 млн теңгеге дейін мемлекеттік грант алу мүмкіндігіне ие болды. Сонымен бірге электрондық коммерцияны оқыту, өздері шығаратын өнімнің тұсаукесерін ұйымдастыру, мамандар тарапынан бизнесті өркендету жөнінде ұсыныстар беріліп, толық маркетингтік қолдауға қол жеткізді.
«Бір ауыл – бір өнім» көрме-жәрмеңкесі – облыстық кәсіпкерлер палатасының JICA халықаралық ынтымақтастық жөніндегі жапон агенттігімен бірлесіп жүзеге асырып жатқан жобалардың бірі. Жапон елінің білікті мамандары аталған жобаның дамуына жан-жақты үлес қосып, тамақ рецептерін ұсыну мен маркетинг жүргізуде қолғабыс етіп отыр. Бастапқы сатыда екеніміз белгілі, бірақ басқа елдер тәжірибесіне қарайтын болсақ, жобаның әлеуеті зор», дейді Абай облысы кәсіпкерлер палатасының директоры Мақсат Әнуарбекұлы.
Мемлекеттік грант иегері атанған төрттіктің бірі – ағаштан жасалған бұйымдары туристердің қызығушылығын тудырған, семейлік шебер Айдар Елубаев. Білікті ұста мектепте «Еңбек» пәнінен сабақ беріп, ұлттық музыкалық аспаптарды, ескі көліктерді, ерекше кәдесыйларды жасайды. Отыз жылға тарта қолөнермен айналысқан ол алғашында бұл істің жай ғана қызығушылық болғанын, сұраныс көбейген соң, өз қолынан жасалған бұйымдарды саудаға шығара бастағанын айтады. Әртүрлі кәдесый дүкендері мен Мәскеу қаласынан түскен коммерциялық ұсыныс кәсіпке мойын бұрғызып, бизнеске біржола келген.
Жоба финалына шыққан жеке кәсіпкердің бірі – Раушан Мұратханқызы. «Адал Ас» атымен танылған оның кәсіпорны 15 жылдан бері 100-ден астам өнім түрін шығарып келеді. Жобаның тағы бір жеңімпазы, көрме тамашалаушыларды таңғалдырған өнім авторы – Мақсат Көшебаев. Малдың тезегі мен көңінен көмір және өңделген мал азығын жасайтын жеке кәсіпкер Абай облысы Ақсуат ауданындағы Екпінді ауылында экологиялық отынның жаңа түрін ойлап тапқан. Арнайы станок ойлап тауып, биыл жобаға екінші мәрте қатысып отыр. Экологияны таза ұстау мен тазарту мақсатында жаңа бастамаға кіріскен оның ойы мақұлданып, грант иеленді.
Жаңа бастамалар мен жобаларға баға берушілердің назарын аударып, мемлекеттік қолдауға ие болған жеке кәсіпкердің бірі – Гүлмира Айғожина. Киіз бұйымдарын өңдеуді меңгерген маман иесі бренд-комитеттің жоғары бағасына ие болған. Ол ұлттық нақыштағы кілем мен баскиім, басқа да табиғи бұйымдар жасайды. Балалар үйінде қосымша білім беретін Гүлмира өз ісін үйретіп, талапты жандарға табыс табуға да көмектесіп жүр.
Шалғайдағы кәсіпкерлер мен ауыл тұрғындарының кәсіпкерлік әлеуетін арттыру, олардың әл-ауқаты мен өмір сүру деңгейін жақсарту мақсатында қолға алынған жоба алдағы уақытта да мемлекеттік гранттар ұсынып, ел экономикасын жақсартуға үлес қосады деген үміт басым.
Абай облысы
