Еңбекқор елі бар елді мекеннің ырыс-құты ортаймайды. Тұрғындарға қызмет көрсететін әлеуметтік нысандар да қалыпты жұмыс істейді. Көшелер жарықтанып, жолдарға асфальт төселіп, ауылдың ажары кірген. Шалғайда жатса да, интернет желісі іске қосылып, әр үйге ауызсу тартылған. Кезінде Текелі қорғасын-мырыш комбинатының Тұйық руднигі жұмыс істеп, Текеліге қорғасын тасыған. 2020 жылдан бері рудникті қайта қалпына келтіру жұмыстары қолға алынған.
Тау қойнауында жатқан Тұйықтың тамаша табиғатына құмартатындар көп. Жаз шыға демалушылар легі ағылады. Сондықтан болашақта туризмді дамыту мақсатында инвестор тарту да – кезек күттірмейтін мәселе.
Биыл Тұйық ауылының әкімі Жеңісбек Әлиасқаровтың саябақ ашу туралы ұсынысына ауыл тұрғындары қолдау білдіріп, құрылыс жұмысы басталған. Жаңа нысан уәделі мерзімде аяқталып, оған «Бесқарағай саябағы» деген атау берілді. Саябақ ауыл жастарының серуен құруына, қонақтар мен қариялардың шүйіркелесіп, немерелерімен қыдырыстауына мүмкіндік туғызды. Жуырда қазыналы қарттар мен ақ жаулықты аналар ақ бата беріп, саябақтың ашылу салтанатын жасады. Оған Кеген аудандық мәслихатының төрағасы Алмасбек Нөкербанұлы қатысып, ауыл жұртын қуанышпен құттықтады.
Алматы облысы
