Осыған орай ұйымдастырылған салтанатты іс-шара барысында аудан әкімі Азизхан Исмаилов қарымды қаламгердің қазақ әдебиетіне қосқан үлесі туралы баяндады. Қалаубек Тұрсынқұлов атындағы мектептен алдағы уақытта елімізді жаңа деңгейге көтеретін білімді де ұлтжанды ұрпақ тәрбиеленіп шығатынына сенім білдірді. Сонымен қатар Жазушылар одағы кеңесінің мүшесі, ақын-жазушы Сламхат Сейітхамзаұлы, аудандық ардагерлер кеңесінің төрағасы Аманбай Омаров, Шарбұлақ ауылдық округінің төбе биі Амантай Құттымбетов құттықтау сөз сөйлеп, Қазығұрттың тумасы Қалаубек Тұрсынқұловтың өмір жолынан әңгіме өрбітті. Жазушының шығармашылық ерекшеліктерімен қатар «Құрмет белгісі» орденімен, «Еңбектегі ерлігі үшін» медалімен марапатталғаны, Саха Республикасының еңбек сіңірген қайраткері, Саха Республикасы Мемлекеттік сыйлығы мен Эрлик Эристин атындағы әдеби сыйлығының, Қазақстан Жазушылар одағы С.Сейфуллин атындағы сыйлығының лауреаты екені айтылды. Салтанатты рәсімнен соң көпшілік қауым атаулы мектепте ашылған Қалаубек Тұрсынқұловтың музейі мен сыныбын аралап, шығармашылығынан бірқатар тың дерекпен танысты.
Сондай-ақ Қалаубек Тұрсынқұловтың 90 жылдығы аясында аудандық Мәдениет сарайында «Қазығұрт береке, бірлік бастауы» атты республикалық ақындар айтысы өтті. Жыр сайысына еліміздің қала және облыстарынан келген от ауызды, орақ тілді 10 ақын қатысты. Қоғам өмірін, өзекті мәселелерді, айтулы жетістіктерді жыр жолдарымен өрбітіп, көпшілікке ой салумен әсерлі кеш сыйлаған республикалық айтыстың қорытындысында қазылар алқасының шешімімен Қарағанды облысынан келген Мақсат Аханов бас жүлдені иеленсе, жүлделі І орынға түркістандық ақын Бекарыс Шойбеков лайық деп танылды. Ал ІІ орынды Алматы облысының ақыны Айым Әмірханова, ІІІ орынды Астана қаласынан Иран-ғайып Айқынбайұлы, Қызылорда облысынан Нұрмат Абдуллаұлы және Алматы қаласынан Нұрзат Талғатқызы еншіледі. Түркістан облысынан Нұрлыбек Мейірманов, Нұрмахан Әріпжанұлы, Шымкент қаласынан Мейіржан Жарылқап пен Қазығұрт ауданының ақыны Ерасыл Жақсыбек арнайы жүлделерді қанжығаларына байлады.
Түркістан облысы
