Тәрбиелік мәні мол іс-шараның мақсаты – халқымыздың салт-дәстүрін, әдет-ғұрпын заманға сай жаңғыртып, оны жастар арасына насихаттап, отбасы институтының мәртебесін көтеру.
«Қара шаңырақ» қоғамдық бірлестігінің басшысы Тұрар Шәкеннің айтуынша, бұл іс-шара биыл екінші мәрте өтіп отыр.
«Елімізде отбасыларға арналған түрлі байқау бар екенін білеміз. Бірақ жас отбасылар арасында этнографиялық бағыттағы байқау өте аз. Бір жағынан, қазір ұрпақ тәрбиесі қатты алаңдатады. Осы салаға қатысты өзекті мәселелер де көп. Оны шешуге де болады. Соның бір жолы – ұлттық құндылықтарды жастардың санасына сіңіру. Бүгінгі іс-шараның мақсаты да осы», деді ол.
Үш кезеңнен тұрған сайысқа 15-ке жуық жас отбасынан өтінім түсіп, байқау шартына сәйкес 8 отбасы іріктеліп алынды.
Тағылымды іс-шара барысында жас отбасылар қазақтың бай салт-дәстүрін дәріптеп, қолөнер бұйымдарымызды насихаттап, ұмыт болған ұлттық тағамдарымыз — үлпершек, өрметөс, қарынбүрме, мипалау, балқуырдақ, әсіпті дайындау тәсілін көрсетіп, көпшілік ықыласына бөленді.
Отбасылық сайысқа ақын, қоғам қайраткері Әкім Ысқақ, Президент орталығының жетекші ғылыми қызметкері Ақбота Хамит, «Қара шаңырақ» ҚБ басшысы Тұрар Шәкен, «Қазақ аналары – дәстүрге жол» республикалық қоғамдық бірлестігінің төрағасы, актриса Айнұр Жүгініс, айтыскер ақын Азамат Малжанбай қазылық етті.
Сонымен тартысты өткен сайыстың бас жүлдесін Мекебай отбасы жеңіп алса, бірінші орын Мұқажан отбасына бұйырды. Екінші орынды Сембек отбасы алса, үшінші орынды Саухан мен Хызайхан отбасы иеленді. Ал арнайы аталым бойынша «Өнегелі отбасы» – Қалит отбасына, «Дәстүрге берік отбасы» – Пірімқұл отбасына және «Көрермен көзайымы» – Мұқан отбасына табысталды.
