АҚТӨБЕ. 29 сәуір. Марат Оспанов атындағы Ақтөбе мемлекеттік медицина университетінің акт залында қайта сайланған Қазақстан Президенті Нұрсұлтан Назарбаевты ұлықтау рәсіміне арналған флешмоб ұйымдастырылды. Бұл туралы egemen.kz тілшісі хабарлады.
Шараға аталған жоғары оқу орнының 300-ден астам студенті мен профессорлық-оқытушылық құрамы қатысты.
Қатысушылар алдымен теледидардан Қазақстан Президенті Нұрсұлтан Назарбаевты ұлықтау рәсімін көріп, сөзін тыңдады. Президенттің ант беруі, туды сүюі, Қазақстан Республикасының Президенті куәлігін тапсыру сияқты шырайлы сәттерде бірдей сары спорттық жейде киген флешмобқа қатысушы жастар қолдарындағы көк және сары жалауларды шалқыта бұлғап, Елбасына деген шынайы ниеттерін білдірді.
Содан кейін, унивнрситеттің тілдер кафедрасының меңгерушісі, «Славяне» этномәдени бірлестігінің мүшесі Евгений Агапов сөз алып, Елбасын ұлықтау рәсімімен шараға қатысушыларды құттықтады. Еліміздің барлық болашақ ілгерілеуі «Мәңгілік ел» ұлттық идеясын жүзеге асырудан тамыр тартатынын айрықша атап өтіп, жастарды жаңа істерге шақырды.
Осы жоғары оқу орнының оқытушысы Бекзат Молдин мен студенті Вадим Медовщиков та жиналғандарға құттықтау сөз арнады. Сондай-ақ, Елбасы алға қойған міндеттерді орындауда жастар, соның ішінде бүгінгі студентердің алдына үлкен міндеттер қойылатынын жеткізді. Флешмобтың соңында шараға қатысушылар «Атамекен» әнін қосыла шырқады.
Сатыбалды СӘУІРБАЙ.
Дерек: egemen.kz.
Сурет: Максим Токарь.
