Жеңістің 70 жылдығына 7 толық, 70 қысқаметражды фильм ұсынады

«Қазақстан» республикалық телерадиокорпорациясы Жеңістің 70 жылдығына орай тарихи-танымдық деректі фильмдер топтамасын ұсынады. Әлем тарихындағы ең сұрапыл соғысқа 1 миллион 200 мың қазақстандық қатысып, оның 600 мыңнан астамы қаза тапқанын, майданды қарумен, киіммен, азық-түлікпен қамтамасыз ету жұмысына балалардан қарттарға дейін қатысқанын ескергенде, бұл – Қазақстан үшін ұмытуға болмайтын тақырып. Сол ересен ерлік пен тынымсыз еңбек шежіресі «Қазақстан» республикалық телера­дио­корпорациясының тапсырысы бойынша «MG production» компаниясы түсірген «Елдің ерлігі» атты 7 бөлімнен тұратын толық­метражды деректі фильмге арқау болды. Ол туған ел үшін жанын пида еткен қаһар­мандардың, тығырықтан жол тапқан командирлердің, Жеңістің жақындауына үлес қосқан еңбеккерлердің тағдырына арналған. Майдан мен тыл оқиғалары бойынша түсірілген көріністер барынша шынайылығымен ерекшеленеді. Деректі фильмдер желісі 2 ақпаннан бастап 20.00-де «Қазақстан» ұлттық телеарнасының эфиріне шығады. Сондай-ақ, Жеңістің 70 жылдығына орай 70 қысқаметражды деректі фильм әзір­лену­де. Онда көзі тірі майдан және тыл ардагер­­лері­­нің естеліктерімен қатар Ресей, Украина, Бела­русь мұрағаттарынан табылған қазақстандық­тар­ға қатысты құжаттар, сол елдердің мұрағат қорынан алынып, бұған дейін телеарналардан берілмеген кинокөріністер бар. Атаққа ұсынылғанымен, тиісті марапаттарын ала алмаған белгісіз батырлар, хабарсыз кеткен солдаттар, соғыс жылдарында суыт көшірілген зауыт-фабрикалар, тыл еңбеккерлерінің елеусіз қалған  ерекше әрекеттері, Қазақстанға еріксіз қоныс аударғандардың ауыр тағдыры кеңінен қамтылған. Бұдан басқа Ұлттық арна эфирі мен «Қазақ радиосы» арқылы майданнан жолданған хаттар оқылып, ол туралы ақпарат Корпорация порталына шығады. «Қазақстан» Республикалық телерадиокорпорациясы «Қазақстан» Ұлттық телеарнасын, «Балапан» және «КAZsport» арналарын, Қазақ радиосын, «Шалқар», «Астана», «Classic» радиолары мен аймақтық телерадиокомпанияларды біріктіреді. Корпорацияның ресми порталы www.kaztrk.kz. Корпорацияның әлеуметтік желілердегі парақшалары: facebook.com/Kaztrk.kz, twitter.com/kaztrk_kz, youtube.com/user/NTKKazakhstan «Егемен-ақпарат».