Каспий мұз құрсанды

Ауа райының күрт суытып, бірнеше күн бойы аяздың беті қайтпауы Каспий теңізі беті­нің қатып, мұз жамылуына соқтырды. Бұл суы тұзды және тұйық теңізде сирек кездесетін жағдай. Теңіз суының қатуына біріншіден, күннің бірте-бірте емес, күрт суытуы себеп болса, екіншіден, сол қарсаңда желдің болмай, теңізде толқындардың аласұрмай тыныш жатуы мүмкіндік берді, дейді мамандар. Сон­дай-ақ, мамандар мұндай жағдайдың Кас­пийде 5-7 жылда кездесетінін айтып отыр. Ақтау маңына келіп, тұрғындардың көз-қуа­нышына айналған аққулар қазір тамақтандыру тұрғысында көмекке мұқтаж емес. – Негізінен аққулардың дені «Қазатомөнер­кәсіп» ЖШС суынан пайда болған Қаракөл қаумалында болатындықтан, Ақтау маңын­дағы аққулардың да қиын жағдайда суы қат­пай­тын аталмыш мекенге ұшып кету мүмкін­дігі бар. Оның үстіне мұз жамылған тек теңіздің жағалауы ғана, орта тұсы қатпаған күйінде, дейді Маңғыстау облыстық табиғи ресурстар және табиғат пайдалануды реттеу басқармасы басшысының орынбасары Орынбасар Тоғжанов. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы. Суреттерді түсірген Талант ҚҰСАЙЫН.