Суреттерді түсірген – Жеңіс ЫСҚАБАЙ
Бұрын бұл елді мекендерге жеткілікті көңіл бөлінбегені белгілі. Себебі халық Алматы маңайында тығыз қоныстанғандықтан, шалғайдағы ауылдардағы әлеуметтік нысандар ескі күйінде қала берді. Облыс орталығына қатынайтын үлкен жол да жөнделмеді. Осы олқылықтың орнын толтыру мақсатында алыстағы ауылдарға қажетті инфрақұрылым тартылып, медициналық, спорттық, мәдени нысандар бой көтеріп жатыр. Оған дәлел – Қызылбалық ауылдық округіне қарасты Көпбірлік ауылындағы іс-шаралар. «Үштөбе – Алмалы – Көпбірлік» автомобиль жолының жалпы ұзындығы 176 км құрайды. Соның кетеуі кеткен 137 шақырымы толық жөнделді. Биыл жолдың 78,5 шақырымы ашылды. Ал қалған бөлігі қанағаттанарлық жағдайда.
«Былтыр ұзындығы 30 шақырым учаске жөнделді. Бүгінде автотрассаның 90–147 шақырым аралығындағы учаскесіне асфальт төселді. Қазіргі кезде абаттандыру жұмысы жүріп жатыр. Жол жиегі нығайтылып, белгілер орнатылады. Жұмыс 10 қарашаға дейін бітеді. Жөндеу жұмысы трассаның екінші, үшінші учаскелерінде де аяқталды. Бұл нысандар пайдалануға берілді. Сөйтіп «Үштөбе – Алмалы – Көпбірлік» жолының барлық аталған учаскелеріне асфальт төселді. Жобаның құны 4,9 млрд теңгеден асады. Жол үшінші санатты, жүру бөлігінің ені 7 метр», деді Б.Исабаев.
Жалпы, Көпбірліктен Алмалы ауылына дейінгі ұзындығы 28 км жол учаскесіне 2021 жылы орташа жөндеу жүргізілген. Жолдың қалған бөлігінің құрылысы төрт бөлікке бөлінген. Облыс әкімі баспасөз қызметінің мәліметінше, келесі жылы «Үштөбе – Алмалы – Көпбірлік» жолының 145-учаскесіндегі Алмалы көпірі жаңғыртылады. Өңірде жақсы, қанағаттанарлық жағдайдағы облыстық маңызы бар жолдардың үлесі жылдың соңына қарай 94%-ға жетеді.
Тұрғындар ауызсу мәселесінің шешілгеніне де дән риза. Ауылда орталықтандырылған су құбыры болғанымен, кейінгі жылдары тұрғындар тұзды су ішуге мәжбүр еді. 2010 жылы ауылда сумен жабдықтау жүйесі қайта жаңғыртылған, жаңа желілер салынып, тереңдігі 100 метрден асатын ұңғыма қазылған. Сол кезде тұщыландыру қондырғысы орнатылып, ысырмалары ауыстырылды. Қабылданған іс-шараларға қарамастан, кейінгі жылдары судың тұздылығы литріне 5,9 грамнан 8 грамға дейін өскен. Сөйтіп, бұл ауыл халқын мазалаған мәселеге айналды. Осыған байланысты, облыс әкімі Бейбіт Исабаевтың тапсырмасына сәйкес бюджеттен қаражат бөлініп, мәселені шешуге қажетті шаралар қабылданды. Атап айтқанда, 2 км желіге қайта жаңғырту жүргізіліп, жаңа су мұнарасы тұрғызылды. Оған қоса тұздану деңгейі литріне тіпті 12 грамға жеткен күнде де суды тұщыландыруға қуаты жететін жаңартылған тұщыландыру қондырғысы орнатылды.
«Ауылда 179 аула бар, соның 168-і орталық сумен жабдықтау жүйесіне қосылған. Ауылда тұратын халық саны 900-ден асады. Ауызсу – тіршіліктің негізгі көзі, денсаулықтың кепілі. Сондықтан оның сапасының жақсы болғаны маңызды. Бізде бірнеше жылдан бері ауызсу сапасы нашар еді. Биыл бұл мәселе шешімін тапты, халық риза. Ауылымызға бұдан былай да көңіл бөлінеді деп сенеміз», дейді ауыл тұрғыны Зәмзәгүл Несіпбаева.
Тұрғындардың тілегіне орай көп ұзамай Көпбірлік ауылында кітапханасы бар мәдениет үйі салынады. Мұны облыс әкімі Қаратал ауданына жасаған жұмыс сапары барысындағы ауыл тұрғындарымен кездесуінде айтты. Ауылдықтардың өтініші негізінде өңір басшысы тиісті лауазымды тұлғаларға аталған нысанның құрылысына дайындық жұмыстарын бастау туралы тапсырма берді.
«Көпбірлік – облыстың ең шалғайдағы ауылының бірі. Мемлекет басшысының тапсырмасына сәйкес облыс орталығына жақын елді мекендерді ғана емес, алыс жатқан ауылдарды абаттандыру мен дамытуға ерекше көңіл бөлеміз. Халықтың өмір сүру сапасын жақсартуға ең алдымен сапалы ауызсу, жол, жарық, әлеуметтік нысандар керек. Тұрғындар тұрмыстың жақсарғанын сөз жүзінде емес, іс жүзінде сезінуге тиіс. Ауылға келетін жолды жөндеп бітірдік, ауызсудың сапасын жақсарттық, денешынықтыру-сауықтыру кешенін, ауыл әкімдігінің кеңсесін салып бердік. Енді сіздердің өтініштеріңізге сәйкес кітапханасы бар мәдениет үйі тұрғызылады. Екі ауылдық округке ортақ өрт сөндіру депосын құрып, қажетті техникамен қамтамасыз етеміз. Сол сияқты көшелерді жөндеуге, жарықтандыруға назар аударылады», деді Б.Исабаев.
Одан бөлек, тұрғындар тарапынан ауыл балаларын түрлі жарысқа апаруға шағын автобус керектігі айтылды. Сонымен қатар Балқаш көлінің жағалауына апаратын 2,5 шақырымдық жолдың мәселесі де көтерілді. Ауылдықтардың айтуынша, әсіресе жаңбырлы күндері жағалауға жету қиындық тудырады. Қос ұсыныс та көп ұзамай шешілетін болады.
Айта кетейік, Көпбірлік ауылы мен Қарақұм ауылы Қызылбалық ауылдық округіне қарайды. Оның маңайында 4 елді мекенді қамтитын Байшегір ауылдық округі бар. Оған Алмалы, Дөңшей, Ақиық, Ақжар ауылдары кіреді. Соның ішіндегі халқы көп Алмалы ауылында үш бірдей әлеуметтік нысан салынбақ. Келер жылы мәдениет үйінің, блокты-модульді дәрігерлік амбулаторияның, спорт кешенінің құрылыс жұмыстары басталады.
Жетісу облысы
