Парламент Мәжілісі Төрағасының орынбасары Дариға Назарбаева бастаған қазақстандық делегацияның Германияға және Лихтенштейн Князьдігіне сапары басталды.
Сапардың негізгі мақсаты – Қазақстанның 2017-2018 жылдарға БҰҰ Қауіпсіздік Кеңесінің тұрақты емес мүшелігіне кандидатурасын ілгерілету, сондай-ақ, екі ел арасындағы парламентаралық өзара іс-қимылдың қазіргі ахуалы мен келешегін талқылау.
Бағдарлама аясында Берлинде Бундестаг Төрағасының орынбасары Йоханнес Зингхаммермен және Берлин Сенатының спикері Ральф Виландпен және Бундестаг депутаттары Санфред Грунд бастаған «Германия – Орталық Азия» парламенттік достық тобының мүшелерімен кездесулер өтті. Кездесу барысында Қазақстан мен Германияның парламентаралық байланыстарын нығайту мәселелері кеңінен талқыланды. Осы ретте тараптар 90-жылдары тарихи отанына оралған этностық неміс азаматтарының «біздің елдеріміздің арасын байланыстыратын көпір» екендігі айтылды. Әсіресе, халықаралық күн тәртібіндегі өзекті мәселелерге назар аударылды.
Германиялық тарап Қазақстанның «тек Орталық Азияда емес, жалпы Азия аумағында тұрақтылық кемесі» бола жүріп, ғаламдық саясаттың ең жауапты жерлерінде қомақты тәжірибе жинап, халықаралық қатынас алаңында маңызды елге айналғанын атап көрсетті. Сонымен қатар, Қазақстан Президентінің Украинадағы жағдайды реттеуге қатысты дәнекерлік рөліне аса жоғары баға бере отырып, өз тараптарынан Минск келісімдерін жүзеге асыру аясында жанжалды бейбіт жолмен шешу үшін бар күш-жігерлерін жұмылдыратынына сендірді.
Ал ГФР Сыртқы істер министрлігінің статс-хатшысы Маркус Эдерермен кездесуінде Дариға Назарбаева Қазақстан Президентінің еліміздің кандидатурасын 2017-2018 жылдарға БҰҰ Қауіпсіздік Кеңесінің тұрақты емес мүшелігіне ілгерілету мәселелері жөніндегі Арнайы өкілі ретінде Германия канцлері А.Меркельдің атына Елбасының жолдауын табыс етті.
Делегация басшысы кездесу иелерін Қазақстанның аймақтық және халықаралық тұрақтылық пен қауіпсіздікті нығайту жолында атқарып жатқан жұмыстарынан хабардар етті. Осы ретте ядролық қарусыздану және таратпау, сондай-ақ, АӨСШК мен ЕҚЫҰ аясындағы белсенді іс-қимылдарға назар аударылды. Д. Назарбаева Қазақстан тарапынан Ауғанстанға жасалып жатқан гуманитарлық және техникалық көмектерді де сөз етті. 2010 жылдан бері мыңдаған ауғандық студенттің Қазақстан жоғары оқу орындарында еркін білім алуына жол ашқан білім бағдарламасы жүзеге асырылып жатқанын атап көрсетті. Қазақстанның мәдениетаралық және дінаралық үнқатысуды қолдау әрі дамыту жолындағы қосып жатқан үлесі де жан-жақты баяндалды.
Д.Назарбаева Германияның қоғамдық-саяси және іскер топтар өкілдерімен кездесуінде Елбасының өткен жылдың қараша айындағы «Нұрлы Жол – болашаққа бастар жол» Жолдауында айтылған Қазақстанның Жаңа Экономикалық Саясатының негізгі бағыттарына және елдегі инвестициялық климатқа тоқталды. Тараптар екі ел арасында, соның ішінде Еуразиялық экономикалық одақ аясында сауда-экономикалық ынтымақтастықты кеңейту мүмкіндіктерін талқылады.
Неміс саясаткерлерінің Парламент Мәжілісі Төрағасының орынбасары Д.Назарбаевамен кездесулері барысында айтқан пікірлері
Зингхаммер ЙОХАННЕС, Бундестаг Вице-президенті: – Қазақстанға елді табысты саяси және экономикалық жаңғырту тұрғысынан келсек, өңірдегі тұрақтылықтың тіні болып табылады. Мен ел басшылығы жүзеге асырып жатқан, қоғамды топтастыру мен конфессияаралық келісімді нығайтуға бағытталған ұлттық саясатты жоғары бағалаймын. Қазақстан – бір елде түрлі этностардың өкілдері түсіністік пен келісімде тұра алатынының жарқын мысалы. Манфред ГРУНД, Бундестаг депутаты, «ГФР-Орталық Азия» парламенттік тобының жетекшісі: – Қазіргі таңда Қазақстан мен Германия арасында тұрақты да өзара сенімге құрылған саяси үнқатысу бар. Қазақстан бүгінде салмақты да ұтымды ұлтаралық саясат жүргізіп келе жатса, бұл үдеріс ұлттық азшылықтар тарапынан кең қолдау тауып отыр. Бұл жерде Қазақстан мен Германия арасында «жанды көпір» қызметін атқарып келе жатқан неміс диаспорасының дамуына да үлкен қолдау көрсетіліп отырғанын атап көрсеткен жөн. Петер ТИЛС, Қазақстан – Германия Іскерлер кеңесінің төрағасы, Deutsche Bank-тің атқарушы директоры: – Немістің іскер топтары Қазақстан экономикасын индустрияландыру мен жаңғыртуға белсенді қатысуға ниетті екендіктерін қуаттап отыр. Өз басым да Қазақстан экономикасын жаңғыртуға ғана емес, Астанада ЭКСПО-2017 халықаралық мамандандырылған көрмесін өткізуге белсенді қатысуға дайын екенін білдіремін. Мұнда жетекші неміс технологияларын пайдалануға да әзірмін. Тағы бір атап көрсетерім, бүгінде көрмеге қатысуға қызығушылық танытып отырған компаниялардың тізімі белгілі. Михаэль ГЛОС, ГФР-дің бұрынғы экономика министрі: – Мен Қазақстан Президенті Нұрсұлтан Назарбаевтың елдің экономикасын дамыту мен халықтың әл-ауқатын арттыру жолында жүргізіп келе жатқан көреген саясатын жоғары бағалаймын. Қазақстан халықаралық аренада да табысты саясат жүргізіп келеді. Бұл өз кезегінде Астанаға өзінің табыстарымен шын мәнінде мақтануға құқық береді. Маркус ЭДЕРЕР, ГФР Сыртқы істер министрлігінің статс-хатшысы: – Қазақстан Германияның Орталық Азиядағы басты әріптесі болып табылады. Қазіргі күнге дейін екі ел арасында орнықты үнқатысу қалыптасып үлгерген. Бұл үнқатысу екіжақты сапарлар алмасулардың жиілігінен және белсенді экономикалық ынтымақтастықтан айқын көрінеді. Немістер Қазақстан мен оның Президентіне Украинадағы жанжалды реттеуге белсенді күш-жігер жұмсап келе жатқаны үшін де дән риза. Сәулебек БІРЖАН.
