Ел ерлігі ұлықталады

Кеше «Нұр Отан» партиясы Төрағасының бірінші орынбасары Бауыржан Байбектің төрағалығымен Жеңістің 70 жылдығын мерекелеу мәселесіне арналған селекторлық кеңес өтті. Бұл шараға бірқатар министрлік пен ведомстволардың, үкіметтік емес ұйымдардың өкілдері, Парламент депутаттары, сондай-ақ, өңірлердегі партия филиалдарының басшылары қатысты. Жиында сөз алған партия Төрағасының бі­рінші орынбасары тұтас ел болып қарсы алатын мерекеге тұп-тура 100 күн қалғанын, демек, бұл атаулы күнді жоғары дең­гейде атап өтуге күш салу қажеттігін жеткізді. Себебі, жыл емес, күн өткен сайын қатарлары си­реп бара жатқан соғыс ардагерлері қан­дай құрметке болсын лайық. Елбасы, «Нұр Отан» партиясының Төр­а­ғасы Н.Назарбаев айт­қан­дай, бірде-бір арда­гер мемлекет назары­нан тыс қалмауы тиіс. Аға ұрпақтың еңбе­гі мен ерлігін бағалау­ды ұдайы назарда ұстай­тын Елбасының тап­сыр­­масы­мен мемлекет әрдайым ардагерлер­ге қолдау көрсетіп келеді. Тәуелсіздік алғаннан бергі аралықта соғыс ар­да­гер­лері мен тыл еңбек­келері баспанамен қамтамасыз етілді. Жыл сайынғы бір рет­тік материалдық көмек­тен бөлек, оларға ком­му­нал­дық, медициналық қыз­мет көрсетуде күнделікті жұмыстар, жол жүруде көп­теген жеңілдік жасалып отыр. Мерейтойдың тек мамырда ғана емес, тұтас жыл бойы ата­лып өтетінін ескере келіп, жа­ңа жыл қарсаңында Мем­лекет бас­шы­сының тап­сырмасымен соғыс ардагерлерін қолдауға арналған жал­пыұлттық акция басталды. Жеңістің 70 жылдығын лайық­ты өткізуге дайындық мә­се­лесі Мемлекеттік хатшы­ның қаты­су­ымен бірнеше жиында тал­қы­ланып, ел Үкіметі мерекені атап өту жөніндегі іс-шаралар жос­парын бекітті, деді Б.Байбек өз сө­зінде. Партия Төрағасының бірінші орынбасары, сондай-ақ, «Нұр Отан» бұл бағытта бірқатар игі­лік­ті шараны атқарып жатқанын тілге тиек етті. Бұл шаралар «Ар­­да­герлерді ардақтайық» жоба­сы аясында жүйелі түрде жүзе­ге асырылуда. Аталған пар­тиялық жоба аясында 2014 жылы еліміздегі 5 мыңнан астам ардагердің тұрмыс жағдайы жан-жақты зерттеліп, оларға қа­тысты 10 мыңнан астам көкей­кесті мәселенің 9 мыңға жуығы өз шешімін тапты. 531 Кеңес Одағының Батыры мен 124 «Даңқ» орденінің толық иегерлері туралы мәліметтер қалпына келтірілді. Біз өткен жылдан бастап, аймақтармен бірлесе отырып, осы мәліметтер базасын құрып жатырмыз. 600-ден астам адам кірген, яғни Ұлы Отан соғысының батырлары мен «Даңқ» орденінің толық иегерлері туралы мәліметтердің толық базасын құру бойынша жүйелі жұмыстар жүргізілді. Онда бұрын-соңды қоғамға белгісіз болған қазақстандықтардың да есімдері бар. Бұл – үлкен жұмыс. Біз бұған қоса, аға ұрпақтың қайталанбас ерлігін ұлықтауға арналған көптеген шара іске асырылып, олар жастарға етене таныс әлеуметтік желілерде, ғаламторда кеңінен насихатталуда. Түптеп келгенде, атқарылар жұмыстың мәні – тағзымды тәлімге ұластырып, Елбасы саясатының, Тәуелсіздіктің арқасында соғыс көрмеген бақытты ұрпақты елдегі бейбіт өмірді, келісім мен бірлікті көздің қарашығындай сақтауға, елінің амандығы мен мемлекетінің тәуелсіздігі үшін сапқа тұруға қашанда даяр болуға тәрбиелеу, деді  Бауыржан Қадырғалиұлы. Осылай дей келе, ол Жеңістің 70 жылдығы аясында ат­қарылатын іс-шаралар шо­ғырына тоқталып өтті. Мәселен, қаңтардың 29-ынан бастап, «Астана» телеарнасында майдангерлер туралы «Қазақстандық қаһармандар» атты 100 бейнеролик көрсетіле бастайды екен. Әр ролик күніне 10 мәрте көрсетіліп, майдангерлердің ерлігін паш етеді. Телекөрермендер халыққа белгілі Бауыржан Момышұлы, Талғат Бигелдинов, Әлия Мол­дағұлова, Мәншүк Мәметова сын­ды батырлардың ғана емес, жұрт біле бермейтін Кеңес Ода­ғы батырларының өмірі мен ерлігі туралы да қызықты дерек­термен таныса алады. Екінші­ден, қазақстандық Кеңес Одағы­ның батырларына арнап, қазақ және орыс тілдерінде 70 фильм түсіру жұмыстары бел­сенді жүргізіліп жатқан кө­рінеді. Үшіншіден, Жеңіс күніне орай, «Қазақстандықтар екінші дүниежүзілік соғыс жылдарында: 100 жаңа дерек» жобасы іске қосылмақ. Төртіншіден, Отан қорғаушы күніне орай, қазақстандық Кеңес Одағының батырлары, «Даңқ» орденінің толық иегерлері мен Халық қаһармандары туралы кітаптың таныстырылымы болады. Мұндай сипаттағы жи­нақ 1968-1969 жылдары жа­рық көріпті. Бесіншіден, Жеңіс күні қарсаңында қаһарман қа­зақстандықтар тақырыбына арналған «KAHARMAN.KZ» сайты іске қосылмақ көрінеді. Бұл сайтта мұрағаттық құ­жат­­тардың көшірмелері, қа­зақ­стандық батырлар туралы ақпа­раттар, соғыс жылдарының жыл­­на­масы, фотогалерея, бейнеро­ликтер, ардагерлер туралы ма­қалалар жарияланбақ екен. Бүгінгі күні 850 мың азаматты және 5600 бастауыш партия ұйымын біріктіріп отырған «Нұр Отан» партиясының әр ардагерге немесе тыл еңбеккеріне тиісті деңгейде қолдау көрсететіндей әлеуеті бар. Мәселен, 2014 жылы партияның қоғамдық қабыл­дауларына 505 соғыс ардагерінен өтініш келіп түсіпті. Сол жылы «Ардагерлерді ардақтайық» партиялық жобасының шең­берінде 5 мың 427 ардагердің өмір сүру, тұрмыс жағдайын зерттеу нәтижесінде 10,8 мың өзекті мәселе анықталған. Олардың 24,5 пайызы тұрғын үйге, 56,2 пайызы денсаулыққа, 19,2 пайызы тұрмыстық мәселелерге қатысты болған көрінеді. Бұған қоса, соғыс өртінен аман қалған қарттардың 21,4 пайызы (1 мың 163 адам) тұрғын үйлеріне жеңіл-желпі жөндеу жұмыстарын жүргізу, 11,7 пайызы (634 адам) баспана­ларын кеңейту, 8,7 пайызы (472) тұрғын үйлеріне күрделі жөндеу жұмыстарын жүргізу, 4,6 пайызы (248 адам) баспана беру туралы өтініш айтыпты. Ал бүгінде ардагерлердің 1,4 пайызы (77 адам) мемлекеттік бағдарлама бойынша баспана алу кезегінде тұрса, олардың 1,2 пайызының (67 адам) пәтерлері қауіпті жағдайда тұрған көрінеді. Бұдан бөлек, партияның қоғамдық қабылдауларына келіп түскен өтініштердің көбісі әлеуметтік және медициналық қамтамасыз ету мәселесіне байланысты екен. Жиын соңында партия Төра­ғасы­ның бірінші орынбасары Б.Бай­бек Жеңістің 70 жылдығын мере­ке­леуге және майдангер қарт­тарға көмек көрсету мақ­са­тында бөлінген барлық қаражат шашау шықпай, өз мақсатына игерілуі қажеттігін айтты. Ләйла ЕДІЛҚЫЗЫ, «Егемен Қазақстан».