Көп кітап сыйлады

Кітапхана – ұлттық құндылықтарды жастарға жеткізе дәріптейтін орын. Өңірдегі мәдени жұмыстардың ұйытқысы болып жүрген аудан әкімі Қанатбек Мәдібектің қол­дауы арқасында кітапханалардың материалдық-техникалық базасы едәуір нығайды. Тек өткен жылдың өзінде 4 кітапхана ғимараты ағымдағы жөндеуден өткізілді. Аудандағы 26 кітапхана түгел компьютер жинақ­тары­мен қамтамасыз етілді және ғаламтор желісіне қосылды. Аудандық кітапхана КАБИС, ал ауылдық кітап­ханалар РАБИС бағдарламасымен жұмыс атқаруға қол жеткізді. Және кітапхана жүйесінің жеке сайты ашылды. Электронды жарнамалық құрылғы орнатылды. Кітап сатып алуға бөлінетін қаржы жылдан-жылға көбейіп  келеді. Үстіміздегі жылы зағип жандарға кітапханалық қызмет көрсететін бөлім ашу көзделуде. Өткен жылы «Кітапханаға кітап сыйлайық» атты атты акция өтіп, іс-шара барысында 903 дана кітап аудандық кітапханаға тап­сы­рылды. Аудан әкімі Қ. Мәдібек өткен жылғы акцияда 145 дана кітап тап­сырса, биылғы жылдың басында Сарысу аудандық орталықтандырылған кітапханалар жүйесіне жерлесіміз, ауда­нымыздың ардақты азаматы Асанәлі Әшімовтің 300 дана фотоальбомын,  Шона Смаханұлының 72 дана кітабын, Маралтай Райымбекұлының 89 дана «Қаратау хазалдары», Сәулембай Әбсады­құлының жерлесіміз, атақты бокс шебері Серік Өмірбеков жайлы 22 дана «Серік – қазақтың батыры» атты кітаптарын сыйға беріп, 22 ауылдық кітапханаға таратылды. Барлығы 600 дана кітап оқырмандарға жол тартты. Светлана ҚОЖАНАЗАРОВА, аудандық орталықтандырылған кітапханалар жүйесінің директоры. Жамбыл облысы, Сарысу ауданы.