Үкімет

Отырардағы Андрей бекіре өсіріп жатыр Бақтияр ТАЙЖАН,   Козлов Павел. Лохов Ан­дрей. Екеуі де кәсіпкер. «Фа­ми­лиялары онша емес екен» деді қасымдағы кісілердің бірі әзілдеп. Әй, қайдам, «фамилиясы онша емес» осы екі дос әлі-ақ Қазақстанға белгілі кәсіпкерлер болады. Деп ойладық. Отырар ауданында 20-25-тей ұлты орыс отбасы бар. Қазаққа әбден сіңген, қазақша оқыған, қыз берген құдандалы. Павелің қазақша мәтелдетіп сөйлегенде өзіңді жаңылдырады. Талапты ауыл округіне қарасты Сары­көл ауылында тұрады. Ес біліп, етегін жапқаннан көл жағалап, ұзақты күн балық аулап өскен сары жалақ ұлдың арманы асқақ. Орындалмайтындай емес. Үлкен бизнестің негізін қалап та қойған. – Мен өзім Академиялық медици­на­лық университетті бітіргенмін, – дейді Павел. – Бірақ, бір орында байыз тауып отыра алмайтын әдетім бар, істің адамымын. Бизнеспен айналысып Қытай, Түркия арасында көп жүрдім. Қалалық бола алмайды екенмін. Ауыл, Сарыкөл тартты да тұрды. Қандай кәсіппен айналасу керек дегенде оңтайын таптым. Сарыкөлдің бергі бөлігінде балық шаруашылығын құруға, бау-бақша егуге және мал бордақылауға мүмкіндік бар екен. Оның үстіне Елбасы ауыл шаруашылығын қолдап, әр жасаған жұмысқа субсидия беріп жатыр. Тай-құлындай тебісіп өскен досым Андрейде техниканың түр-түрі бар. Менде де бизнестен жинаған қаржы жетеді. Айттым. Ол көнді. Екеуміз бірлесіп жайылым болған 212 гектар жерді сатып алдық. Аудан әкімі Салхан По­ла­товқа рахмет, Идеямен бар­ға­нымызда әр жағын айтқызбай түсініп, барлық көмекті жасаймыз деді. Әрі қарай Павел мен Андрейдің не істегенін тың­даңыз. 212 гектар жердің 50 гек­тарының мақсатын ауыстырып, балық шаруашылығымен айналысу үшін үлкен тоған салып, сумен толтырады. Бер жағындағы 50 гектар жерді бау-бақша егуге дайындап қойған. Өзбекстанда Шредер атындағы ғылыми-зерттеу инс­титутынан төрт түрлі сортты 6 мың түп алма ағашын әкелген. Тамшылатып суарылады. Павел өз үйіндегі шағын бассейіндерде карп тұқымдас балық шабақтарымен бірге бекіре өсіріп жатыр. Павел мен Алексейдің алға қойған жос­пары үлкен. 50 гектар жерге тоған қазып су шығарған. Бер жағындағы 50 гектар жер мәуесі төгілген бау-бақша болады. 212 гектар жерінің бір иіні мыңнан аса ірі қара мал бордақыланатын орталыққа айналмақ. Салынып жатқан инвестиция көлемі 900 млн. теңгеден асады. Павел айтады. Мылтығын қыл­тың­датып қырғауыл тауып бер дейтіндер көп. Көңілін қимаймын. Қалың қорысқа кіре алмайды. Мен 10 гектар жерге қыр­ғауыл өсірмекпін. Қыр­ғауылдан бөлек қоян, жабайы шошқа жіберіледі. Қазір «корольдік» деп аталатын жиырмашақты аң қағатын иттерді өсіріп жатырмын. Осы он гек­тар аумақта ит баулайтын станса болады. Аңқұмарға аңшы ит қосып береміз. Аң қағатын ит құс пен аңға жақындағанда қалт тоқ­тап, дайындал деген белгі бе­ре­ді. Бұйырған несібе өзің­дікі. Осы кезде әңгімеге аудан әкімі Са­лыхан Полатов араласқан. – Бұл өзі өркениетті елдердің бәріне тән жағдай. Бізге де жетті. Бір бұғы, маралдың ату бағасы мың долларға дейін. Несі бар, жүз жабайы шошқа өсірсе жылда жиырма-отызын белгілі бір мөлшердегі ақшаға атқызуға беруге болады. Қырғауыл, қоян да солай. Әрі аңшының мыл­тығы қанданып, көңілі тоят­тайды. Әрі серіктестіктің биз­нес­ті өркендетуге қаржысы кө­бейеді. Павел мен Андрейдің соққан тоға­нының жағалауын көрдік. Суға емін­діре балық аулайтындар алаңқайлар қал­дырылған. – Бұл жерге елдің қалтасына қарай демалыс орындарын саламыз, – дейді олар. – Бірінде суы, әжетханасы ішінде бес-он адам сиятын котедж салынады. Отбасымен демалуға, яки достары­мен бірлесіп келгендерге. Енді бір алаңқайларда қара үй тігеміз. Үндістердің вигвамы секілді лашықтар да салу ойда бар. Экзотика. Экотуризм. Кім қалтасына қарай қайсысын таңдайды. Балық ауласын. Өздері пісірем десе жағдай бар, болмаса біздің аспаздар дайындап береді. – Қарп тұқымдас балықтар үшін алаңдамаса да бола­ды, уылдырығы алтынға баға­ла­натын бекіренің жайы қалай, жерсіне ме? – Сонау бір жылдары Са­рыкөлде балық шаруа­шы­лығы дүрілдеп тұрғанда бекіре өсірілген. Адамдар түк қоймай сүзіп алды ғой. Мен үйдегі бассейндерде карп тұқымдастардың да, бекіренің шабақтарын да өсіріп жатырмын. Әртүрлі температурада байқап көрдік. Бекіре уылдырық шашқаннан кейін суықта көл түбінде дамылдап жатады. Біз тоғанның бір тұсын тереңдетіп қазып, оған ыстық су жіберіп тұрамыз. Құдайға шүкір, бізде жердің астынан қайнап шығып жатқан термальды ыстық су бар. Онда бекіреден жыл бойына уылдырық аулауға болады. Оның сыртында өзіміздің еккен бидай, жүгеріміз бар. Яғни сырттан жем сатып алмаймыз. Мақұл, Павел мен Андрей, екеуінің іскерлігіне сенген инвестор осы үлкен шаруаға үлкен қаржы салды. Мемлекеттің жәрдемі қайсы?! Бұл түйінді аудан әкімінің бірінші орынбасары Әбдіғани Жүніс тарқатып берді. Біріншіден, елу гектар жерге егілген бау үшін кеткен шығынның 50 пайызын мемлекет өтеп береді. Алма өнім беретін үш жылға дейін бұл жігіттеріңіз мемлекет есебінен бір шығынының орнын жабар екен. Әрі қарай таза өнімінің пайдасы өздерінікі. Міне, мемлекеттік бизнесті ынталандыру. Балық шаруашылығында да осы. Тоған қазған үшін төленеді, балық тұқымын көбейткені үшін төленеді. Қыл аяғы мың басқа салған сиыр қораның да жарты шығынын мемлекет қалтасы жабады. Енді не істе дейсіз?! Павел мен Андрей ұлтымыз бөтен, қазақ емеспіз демейді. Елім деп сөйлейді. Әлі отызға да толмаған екі сары жігіт ішінде экотуризмі бар үлкен саланы қолға алды. Облыс, аудан әкімдігі бар көмекті беріп отыр. Бекіренің сорпасын аңсап, уылдырығын асап жегіңіз келсе Отырарға келіңіз.   «Егемен Қазақстан».Оңтүстік Қазақстан облысы.  

Екіжақты келісім – дамытады ел ісін

Елбасы биылғы Жолдауында халық­аралық қаржы ұйымдарымен, әсіресе, Еу­ропа қайта құру және даму банкі, Ис­ламдық қаржы жүйесімен тығыз әрі нәтижелі жұмыс жасауды тапсыр­ды. Алда келе жатқан дағдарыста алаң­сыз отырмау керектігін ескертті. Сондықтан жан-жақтан инвестиция тартып, экономикаға жаңа серпін әкелу керектігін мәлім қылды. Мұның бәрі бекер айтыла салған сөз емес. Өйткені, әлем тағы бір үлкен дағдарыстың алдында тұр. Қызылорда облысы Елбасының тапсырмасын орындауға едел-жедел кірісіп кетті. Солайша, Ұлыбританияның қақ төрі Лондонда Қызылорда облысының әкімдігі мен Еуропа қайта құру және даму банкі Сырдың бойындағы сырбаз қаланың инфрақұрылымын дамыту бойынша несиелік келісімдерге қол қойды. Бұл қандай келісімдер? Айтайық. Екіжақты келісімдер бойынша Қызыл­орда қаласының электр, жылу және су желілерін қайта жаңғырту жобаларын жүзеге асыру көзделеді. Бұған қоса, облыс орталығындағы көшелерді жарық­тандыру жүйесін қайта жаңғыртуға байланысты да пәтуаласты. Басқосуда Еуропа қайта құру және даму банкінің президенті Сума Чакрабарти «Біз Қызылорда облысының банк органдарымен серіктестік қарым-қатынас орнатқанымызға қуаныштымыз. Қазақстан Үкіметімен жасалған келісім аясында Қызылорда қаласының өмір сүру сапасын жақсартамыз. Біз былтыр маусым айында өңірге барғанда осы жобаларды жүзеге асыру мәселелерін талқылағанбыз. Енді жобаларды нақты жүзеге асыру мақсатында қол қойып отырмыз», деп атап өтті. Өз кезегінде Қызылорда облысының әкімі Қырымбек Көшербаев Еуропа қайта құру және даму банкінің президентіне алғысын білдірді. – Елбасы шетелдік қаржы институт­тарымен жұмыс жасауды тапсырған болатын. Осыған сәйкес, біз бүгін жобалары­мызды жүзеге асыруға қол қойып отыр­мыз. Бұл Қызылорда облысының эконо­микалық-әлеуметтік ахуалын көтере­тініне сенемін,– деді Қырымбек Елеуұлы. Осы арада айта кетерлік бір жағдаят бар. Қазақстан бойынша Еуропа қайта құру және даму банкімен екі-ақ аймақ келісімге келіп, жұмыс істеп жатыр. Оның біріншісі – Алматы қаласы болса, екіншісі – Қызылорда облысы.   Ержан БАЙТІЛЕС, «Егемен Қазақстан». ҚЫЗЫЛОРДА.

Істі ширата түсу қажет

  Ел дамуының ерен жоба­ларының бірі Щучье-Бурабай курортты аймағын дамытуға қатысты жүзеге асырылып жат­­қаны белгілі. Қазақстан Пре­зиденті Н.На­зарбаевтың тікелей бақылауындағы кешенді шаралар жоспары екі кезеңді қамтиды. Осыған байланысты жуырда Ақмола облысының әкімі Сергей Кула­гин­нің төрағалығымен Щучье қаласында кеңейтілген мә­жіліс өткізілді. Күн тәрті­бін­дегі «ЩБКА-ны дамыту жә­не Көк­шетау қаласының маңын­дағы азық-түлік белдеуін қалып­тас­тыру» мәселесін тал­қы­лауға облыстық басқармалар мен қыз­меттердің басшылары, қалалар мен аудандар әкім­дері, агроөнеркәсіп және туризм индустриясының өкілдері қатысты. Облыс әкімінің бірінші орынбасары Қадырхан Отаров өз баяндамасында бұл бағыттағы кең ауқымды шаралар әлемдік деңгейдегі туристік орталықты құруға жұмылдырылғанын атап көрсетті. Белгіленген 85 іс-шараның 21 миллиард тең­гені құрайтын 48-і облыс енші­сіне тиесілі. Өткен жылы осы жұмыстарды атқаруға 3,9 миллиард теңге қаржы бөлінсе, биыл, яғни жоспардың екінші кезеңін іске асыру үшін 2,6 миллиард теңге қаржы жұмсалады деп күтілуде. Жоспар аясында әлеуметтік және тұрғын үй құрылыстары жүргізіліп, қа­жетті инфрақұрылым нысандары салынып жатыр. «Жұмыспен қамтудың жол картасы-2020» бағдарламасымен денсаулық сақтау саласының 6 нысаны күрделі және ағымдағы жөн­деу­ден өткізіліп, 2 дәрігерлік амбулатория мен 3 мектеп пайдалануға берілді. Бүгін Щучье қалалық ішкі істер бас­қар­масының жедел басқару орталығы ашылса, қо­ғамдық тәртіпті сақтаудың тағы да үш нысаны қатарға қосылады деп жоспарланып отыр. Елбасының бастамасымен игілікке жаратылған «Қазақстан Лапландиясы» ойын-сауық ке­шені жұртшылық тарапынан үлкен қызығушылық тудыруда. Заманалық думанды орда қыстың үш айы аралығында 14 мыңнан астам туриске қызмет ете алады. Жақын күндерде, халықаралық деңгейдегі «Rixos» отелі маң­ын­да курортты аймақтағы ең бірінші «Вейк парк» ашылмақ. Ол жыл бойы қызмет көрсетіп, Бурабайдағы туристік кластерді жаңа деңгейге көтеретін болады. Курортты аймақты дамы­ту­дың 2014-2016 жылдарға ар­нал­ған екінші кезеңіне белгі­ленген жұмыстарды атқа­ру­ға рес­публикалық бюд­жет­тен 47 миллиард теңге бөлу қа­рас­тырылса, облыстық қа­зынадан тағы да 690 миллион теңге бөлінбек. Жалпы, 2014 жылы бекі­тілген жобаларға қатысты қар­жының 95 пайызы игеріліпті. Инфрақұрылымды жетілдіру нәтижесінде туристер ағымы 2000 жылмен салыстырғанда 2014 жылдың тоғыз айында 1,3 есе өскен. Жаңадан 24 экскур­сиялық мар­шрут ашылып отыр. Мемлекет назарындағы жобаларды іске асыру инженерлік-коммуналдық инфрақұрылымды, көлік-логистикасын дамытумен шектелмейді. Мұнда өнеркәсіп секторы мен азық-түлік белдеуін қалыптастыру шешуші маңызға ие. Мәжілісте осыған байланыс­ты Көкшетау аймағында 7,9 миллиард теңгенің 25 жобасы пайдалануға берілгені айтылды. Оның 84 пайызы астықты қайта өңдеу және астық қоймаларының құрылысын қамтиды. Сондай-ақ, тауарлы сүт фермасы  салынып, өнім тікелей өндіріс орнында өңделуде. Көкөніс қоймалары мен жылыжайлар қатары толыға түсті. Баяндамашы маңызды істегі көлеңкелі тұстарға да кеңінен тоқталды. Мәселен, облыстық басқармаларға жүктелген, 11 миллиард теңгеге бағаланған шаралардың тек жетеуі ғана жүзеге асырылып, жиырма үші бағдарламаның екінші кезеңіне ауыстырылыпты. Әсіресе, тұрғын үй-коммуналдық шаруашылығы, білім беру және денсаулық сақтау саласында көрсеткіштер көңіл көншітпейді. Мәселен, білім саласы бойынша Еңбекшілдер, Бурабай және Зеренді аудандарында жүзеге асыру жоспарланған 6 мектептің үшеуі ғана пайдалануға берілген. Әсіресе, Щучье қаласындағы 900 оқушыға арналған мектептің құрылысы сағыздай созылуда. Бұған әрине, қаржы уақытында аударылмаса түсіністікпен қарауға болар еді. Алайда, бұл келеңсіздік жергілікті әкімдіктегі жауапты адамдардың және мердігерлердің салғырттығы мен жауапсыздығынан орын алып отырған көрінеді. Мұндағы негізгі себеп атқарушылық тәртіптің босаңдығынан, жо­балық-сметалық құжаттардың сапасыз дайындалатындығынан, оның жиі өзгеріске түсетін­дігінен, инвестициялық жобаларды қорғаудың әлсіздігінен және тендерлік саясаттың тұрақ­сыз­дығынан өрбіп жататыны сыналды. Облыс әкімі қорытынды сөзінде жұмысты ширата түсуге бағытталған нақты тапсырмаларды алға тартып, жауапты адамдардың қызмет қайтарымы қатаң бақылауда болатындығын ескертті.   Бақберген АМАЛБЕК, «Егемен Қазақстан». Ақмола облысы, Бурабай ауданы.  

Ауылдағылардың айтары аз емес

Мемлекет басшысының Жарлығына сәйкес биыл 11-ші рет өткізіліп жатқан барлық деңгейдегі әкімдердің есепті кездесулері ашық сұхбат алаңына айналып, еліміздің қоғамдық-саяси өмірін демократияландыру үдерісінің оң тәжірибесін қалыптастырғанын ешкім жоққа шығара қоймас. Бір айға жуық созылып, таяуда ғана аяқталған облыстағы 209 округ әкімдерінің 700-ге жуық есептеріндегі бағалы  ұсыныс-пікірлерді жинақтап, саралайтын болсақ, әртүрлі сипаттағы мәселелердің көптеп көтерілуіне қарағанда жергілікті жерлерде шешімін табатын жайлардың әлі аз еместігін, ішкі мүмкіндіктердің толық жұмылдырылмай отырғанын аңғартады.   Қызылжар ауданы Архангельск ауылдық округіне қарасты екі елді мекенде 2 мыңға тарта адам тұрады. Жұртшылық алдында әкімнің мін­детін атқарушы Ирина Рыбакова есеп берді. Ол мал шаруашылығы, денсаулық сақтау, білім беру салаларына, «Жұмыспен қамтудың жол картасы-2020» бағдарламасы шең­берінде атқарылған жұмыстарға тоқталды. Өткен жылы тұрғындар тарапынан 10 сауал қойылса, қазір көбюіне қарағанда ауылдықтардың айтары аз болмаған тәрізді. Мә­селен, қалааралық қоғамдық көлік қатынасының көтеріліп келе жатқанына бір жылдан асса да, күрмеуі қиын күйінде қалып отыр. Сандық телефон стансасының салынатыны қуантқанмен, сапалы ауызсу жайы өткір тұр. Интернет жетістіктерін пайдалану мүмкіндігі қол жетпес арман сықылды. Әсіресе, оқушылар қатты қапалы. Сол сияқты күл-қоқыс төгетін ар­найы орын бөлу, көшелерді жарық­тандыру, мал жайылымына қатысты да нақты ұсыныстар айтылды. Жиынға қатысқан аудан әкімі Болат Жұмабеков көпшілікті толғантқан шетін мәселелердің ше­шілетініне сендіргендей болды. Осы ауданның Лесное ауылдық округінде 1300-дей адам түтін тү­те­тіп отыр. Егіншілікпен 1 серік­тестік, 7 шаруа қожалығы, сүт қа­был­даумен 4 кәсіпкер айналысады. Хоккей корты, спорт алаңы бой көтерген. Глубокое ауылында мектеп, кітапхана, медициналық қосын жұмыс істейді. Алайда, мұнда да жұртшылықты толған­ды­ратын мәселелер жетіп-арты­лады. Осында жарты ғасырға жуық тұрып келе жатқан Нұрғиза Шай­жанова су мен жарық жайы жол­ға қойылғанымен, жолдардың уақ­тылы тазаланбайтынына, тек орталық көшелер ғана қардан аршылатынына ренішін білдірді. Глубокойлықтарды ең қинайтыны – қоғамдық көліктің жүрмейтіні. Осы себепті бар-жо­ғы 40 шақырым қашықтықта ор­наласқан облыс орталығына жаяу­лап қатынауға мәжбүр. М.Жұмабаев ауданына қа­расты Қарақоға ауылдық ок­ру­гінде 3 мыңға жуық тұрғыны бар Қа­­рақоға, Чистое, Ноғайбай елді мекендері қарайды. Он жылдан бері әкімдік қызмет атқарып келе жатқан Анна Жорованың есе­бін тұрғындар қанағаттанарлық деп тапты. Олай болатын жөні бар. Өйткені, атқарушы билік пен тауар өндірушілер арасын­да өзара түсіністік қарым-қаты­нас орныққан. Шаруашылық же­тек­­ші­лері адамдардың күнде­лікті мұң-мұқ­таждарын өтеумен қатар 3 мектеп­тің, осынша ФАП-тың, 2 шағын орталықтың, дәрі­хананың, кітапха­наның жөндеу жұмыстарына да қаржылық қол­дау көрсетіп отырады. 16 ша­ғын және орта бизнес субъек­ті­лері қарамағында шаштараз, екі дәмхана, наубайхана, ав­то­кө­лік­тер­ге техникалық қызмет көрсету ор­талығы, мал сою алаңы секілді нысандар бар. Мамлют ауданындағы Ново­михайловка да ірі округтердің бірі. Оған кіретін бес елді мекеннің тұр­ғындары әкім Беркімбай Уәлиев­тің тапсырмаларды үлкен жауап­кершілікпен орындайтын іскерлік қасиетін жоғары бағалап жүр. Оның бұл жолғы есебі де жұрт­шылық көңілінен шықты. Көше­лерге 28 шам орнатылған. Становое тасжолын жөндеуге 150 миллион теңге бөлінген. «Ақ бұ­лақ» бағдарламасы шеңберінде жаңа су колонкалары қойылған. 3 жас маман жұмысқа алынып, бас­­пана берілген. «Бизнестің жол картасы-2020», «Жұмыспен қам­ту-2020» бағдарламалары бойын­ша несие алып, түрлі кәсіппен шұ­ғылданушылар қатары көбейе түскен. Округ әкімі алдағы уақыт­та ғаламтор желісі орнатылатынын, «Жедел жәрдем» қосыны құрылатынын, мәдениет нысаны жөнделетінін мәлімдеді. Өмір ЕСҚАЛИ, «Егемен Қазақстан».

Алақай, бізге газ келді!

Красный Кордон ауылы Арақарағай орманына ентелеп кіріп жатыр. Қаңтардағы боран қарды үйіп тастапты, қысқы шілде де енді басталғандай. Арқаның сары шұнақ аязы бетті шымшып тұр. Ауылға газдың келуін салтанатты атап өту үшін аудан әкімін күткен ауылдас­тар аязды елер емес. Ән де айтылды, ауылдың ардагер анасы Вера Федоровна Улысенко қуаныштан өлең де жазып жіберіпті. Газдың сары түсті құбырлары көшеге өзгеше түр беріп тұрған секілді. Өзге ауылдардай емес, орманның іргесіндегі елді мекенге отын дайындау аса қиынға соқпайтын. Жылына орман шаруашылығынан керекті отынын жаздырып алады. Бірақ өркениет игілігі – көгілдір отынның рахатын қазір кім білмейді дейсіз. Ауылдың гүлденуі газдандыруға байланысты екені анық. Ауылда 270 қожалық және көпқабатты үйлерде тағы 70 пәтер біртіндеп газ құбырына жалғанып жатыр. Бүгінге дейін 74 үйге көгілдір отын кірді. Осы Красный Кордон ауылында Мусфира Пименованың тұрғанына 25 жылдан асып кетті. Осы жылдар бойы екі пешке от жағып келді. Жылына 15 текше метр отын алады. Таңертең жылы төсектен тұрып, мұздап кеткен үйде дірдектеп жүріп от жағу, бұрқыратып күл алудың қолайсыздығы ауыл әйелін жүдетеді. Бір-екі күннің ішінде-ақ көгілдір отын Мусфираға пеш жағудың қиындығын ұмыттырғандай екен. Мұндай рахатты тек ғана армандап келдім. Ауылға газ келеді дегеннен қуанышымыз қойнымызға сыймай жүрдік. Міне, үйдің іші тәулік бойы бірқалыпты температурада тұрады, бір шырпы жақсам шай қайнап тұр. Елбасы саясатының арқасы деп білеміз бұл игілікті. Сосын облыс, аудан басшыларына, газ құбырын тартқан мамандарға шексіз рахметімді айтамын, дейді Мусфира Пименова. Сонымен қатар, ауыл тұрғындары газ құбырының бүкіл сметалық-жобалау құжаттарының қаржысын төлеген осы жердегі «Кохан» жауапкершілігі шектеулі серіктестігінің директоры Павел Урбановичке, алты ай бойы орманды, батпақты даладан құбыр өткізген «Стройгазэкспертиза» жауапкершілігі шектеулі серіктестігінің директоры Еркін Асадов пен оның мамандарына ризашылықтарын айтумен жүр. Красный Кордонға көгілдір отын келуінің тұ­­сау­кесерінде Алтынсарин ауданының әкі­мі Батырбек Ахметов ауыл тұрғындарын қуа­ныш­тарымен құттықтады. – Красный Кордон ауылы тұрғындарының тұрмысы бұрынғыдан да жақсаруы үшін бюджеттен 204 миллион теңге бөлінді. Міне, осы қаржыға 18,6 шақырым газ құбыры тартылып, әр үйге көгілдір отын кіріп тұр. Енді алдағы жылы ауызсу құбыры тартылады. Оған да республикалық бюджеттен қаржы бөлініп, «Ақ бұлақ» бағдарламасы бойынша жұмыс жүріп жатыр, – деді әкім. Соңғы аз ғана жылдың ішінде Алтынсарин ауданында төрт елді мекен газ құбырына қосылды. Өткен жылы Малая Чураковка ауылы көгілдір отынмен қамтамасыз етілді. Биыл Красный Кордон ауылы қуанып жатыр, ал келесі жылы газ құбыры Щербаков ауылына да жетеді. Батырбек Ахметов Красный Кордон ауылдық округінің әкімі Владимир Урбановичтің есеп беруі жиынында биыл осындағы мектеп пен клубтың қазандықтары газбен жылытуға лайықталып ауыстырылатынын да айтты. Сонымен қатар, ауызсу құбыры да біртіндеп, ауылдарды аралап келеді. Обаған, Силантьевка, Малая Чураковка ауылдары ауызсудың рахатын көріп отыр. Енді Щербаков пен Большая Чураковкаға баратын су құбырының құрылысы жүреді. Әкім жаһандық экономикалық дағдарыс қусырғанымен біздің елімізде адамдар үшін әлеуметтік жағдайдың жасалуы алдыңғы орында тұратындығын қуаныш үстіндегі тұрғындардың есіне салды. Нәзира ЖӘРІМБЕТОВА, «Егемен Қазақстан». Қостанай облысы, Алтынсарин ауданы, Красный Кордон ауылы.