Арзан көлік ағыны

Мұның өзі жекелеген адамдар үшін баю, бизнес көзі саналғанымен, мемлекеттік тұрғыдан ойлайтын болсақ, көлеңкелі жақтары басым, дейді облыс тұрғындары. Қаржылық қиындыққа душар болған елдердің бірі – Ресей. Алпауыт мемлекетте қалыптасқан күрмеуі қиын ахуал шаңырағымызды шайқалтып, экономикамызды тұралатып кетпей ме деген күпті көңілде жүрген жандар аз емес. Өйткені, жылқы жылы девальвацияға ұшыраған рубльдің әлі «ес жияр» түрі көрінбейді. Міне, қой жылының алғашқы айы да түгесілді. Алайда, қазақстандықтардың арзан заттар мен тауарлар үшін толассыз шекара асуына қарағанда, «ауылымыз аралас, қойымыз қоралас» көршілеріміздің ұлттық валютасы бағамының орнығуы ұзаққа созылатын сыңайлы. Алып Ресейдің қаржылық жағдайын шекараның шетін, желдің өтін мекендеген теріскей аймақ қалай қабылдап отыр деген сауалға жауап алу мақсатымен түрлі мамандық иелерін әңгімеге тартқан едік. Айгүл БЕЙСЕНОВА, мұғалім: – Мұнай бағасының құлауы аздай Еуроодақ елдері мен АҚШ тарапынан қолданылған санкция­лар Ресейдің қаржы жүйе­сін­дегі қиындықтың бас­ты себебі болды. Жан-жақтан «шабуылдаған» экономикалық қыспақтар рубль бағамын күрт түсіріп жіберді. Бұдан ешкімнің ешнәрсе ұтпасы анық. Оның тау­қыметін  қарапайым от­басылардың сезініп отырғаны рас. Менің жұбайым көп жылдан бері Түмен облысында жұмыс істейді. Рубльдің құнсыздануы салдарынан жалақысы екі еседей кеміп қалды. Отбасылық табыстың азаюы көңіл-күйімізге қатты әсер етті. Есесіне ол жақтан арзан көлік пен тауарлар әкеліп, қуантып тас­тады. Жұртпен жаға­ласып, 300 шақырым Омбыға бір­неше мәр­те барып келдік. Кеден бекет­терінен өту бір мұң болды. Қазір де кезек көп көрі­неді. Біреулер аз жалақысын үнем­деп, бала-ша­ға­ны киіндіру қамы­мен барса, енді біреулердің қымбатқа сату тір­лігімен айналысып жүргені анық. Қазіргідей жаһандану зама­н­ында елдердің бір-бірімен байланыссыз, томаға-тұйық өмір кешуі мүмкін емес. Біздің ерекше үміт артатынымыз – Еуразиялық экономикалық одақ. Оған мү­шелікке енуге мүдделілік танытушы елдер қатарының көбейгені қуан­тады. «Көрші ақысы ауыр», «Үй салсаң, алдымен көршіңді таңда», дейді қазақ. Ресейдің үш облысымен шектесетін Қызылжар өңі­рінің тұрғындары рубль баға­мының орнығуына тілектес. Дмитрий ЕФИМЦЕВ, жеке кәсіпкер: – Жаңа жыл қарсаңында қа­ра­құртша қаптап кеткен шоп-тур­ларды айтпаңыз! Халықтың шекара бекеттерінде иін тірескені соншалық, күні бойы кезекте тұруға тура келді. Ресейден бұрынырақ әкелінген тауарларды арзанға бұлдауға мәжбүр болдым. Негізгі кәсібім үзіліп қала ма деп қатты қобалжыдым. Кей жергілікті кәсіпорындар өнімдерін өткізетін нарық көзін таппай әбден әуре-сарсаңға түсті. Өйткені, азық-түліктен бастап құрылыс материалдарына дейін дүкен сөрелері лық толды. Оны айтамыз-ау, айырбас пункттерінде рубль таусылып қалғандықтан Астанаға, жеңіл көлік іздеп, Татарстан, Башқұртстан, Мәскеу, Санкт-Петербург жаққа жол шеккен таныстарым болды. Мен ресейлік кәсіпкерлермен жиі байланысып тұрамын. Олар да рубльдің құлдырауынан қат­ты зардап шекті. Меніңше, бас­қа елдердің өтпелі, уақытша қиын­дықтарына еш қуануға болмайды. Бәлкім, жекелеген адам­дар­дың әл-ауқаты жақсарып кетер. Ал, тұтас мемлекет үшін зардап­тары ауыр болуы ықтимал. Шүкір­шілік, Қазақстан оның сал­дарын сезіне қойған жоқ. Өйтке­ні, халықтың өмір сапасын жақсар­туға бағытталған кешенді әлеу­меттік бағдарламаларымыз бар. Бүгінде жеңіл көлік саудасы қызып тұр. Жаңа жылға дейін петропавлдықтар 600 автокөлік сатып алса, биыл 200-ге жуық «темір тұлпар» әкелген. Халыққа қызмет көрсету орталығында 800-дей көлік ресімделген. Бұлардан 72 миллион теңге салық түскен. Арзан заттар, тауарлар, бұй­ым­дар әкелу мақсатымен Ресей­ге қарай сапар шеккен жолау­шы­лар­дың қатары әлі қалың. «Жаңажол» бекетінен тәулігіне бір мыңдай көлік өтетін көрінеді. Пікірлерді жинастырған Өмір ЕСҚАЛИ, «Егемен Қазақстан». Солтүстік Қазақстан облысы.