Ақтауда лаңкестікті насихаттаған әйелге сот болды

АҚТАУ. 30 қаңтар. Ақтауда WhatsApp желісі арқылы лаңкестікті насихаттаған әйелге сот болды. Бұл туралы egemen.kz тілшісі хабарлады. Жергілікті 27 жастағы тұрғын әйел электронды құралдармен WhatsApp желісі арқылы «терроризмді насихаттады» деп айыпталды. Ол 2014 жылдың 10 маусымы мен 9 тамызы аралығында өзімен діни көзқарасы бірдей адамдарға «халықаралық терроршылардың әрекетін» ақтайтын идеялар мен пікірлерді таратқан. Тергеу, сондай-ақ, күдікті Сирядағы лаңкестік ұйымдар мүшелерінің әрекетін ақтайтын «аудиожазбалар» таратқан» деген дерек келтіреді. Өзіне тағылған кінәларды толықтай мойындамаған айыпталушы әйелге Ақтау қалалық соты төрт жыл бас бостандығынан айыру және жазаны жалпы режимдегі түзеу колониясында өтеуге үкім етті. Үкім заңды күшіне енген жоқ. Гүлайым Шынтемірқызы. Дерек: egemen.kz. Сурет: alashainasy.kz.