Жұмысын 2019 жылдың желтоқсанынан бастаған компания негізінен астық жинау комбайндарын шығарады. Бөлшектердің көбін «КЗ «Ростсельмаш» пен «Клевер» компанияларынан алады. «Vector 410», «Acros 550» астық комбайндарының бірнеше түрін ұсынады. Шағын және орта қуатты «YTO-X904», «YTO-X1304» тракторларын да құрастырады. Дайын техникалар «ҚазАгроФинанс» және «Өнеркәсіпті дамыту қоры» арқылы астықты алқапта ел ырысын молайтып жатқан даңғайыр диқандарға жеткізіледі.
– Егіншілік мәдениетін жетілдіріп, технологияны тап-тұйнақтай атқаруың үшін қолда бар техника үздіксіз жүріп тұруы керек, – дейді Зеренді ауданындағы «Құлан» шаруа қожалығының агрономы Мағжан Құланұлы, – Әкем шаруа қожалығын құрарда жоқтан бар жасап, күресінде қалған кеңес заманындағы ескі техникасының қаңқасынан жинап, қарекет еткен болатын. Бір күн жүрсе, екі күн тоқтап тұратын ондай техникамен жұмыс істеу қазір мүмкін емес. Соңғы жылдары ауа райы мүлдем өзгеріп кетті. Ойға алған шаруаны сәтімен сабақтауға қожалықтың машина-трактор паркін заман талабына сай жаңғыртуға ұмтылып жатырмыз. Жаңаның аты жаңа, биылғыдай жауын-шашын көп болған жылы көктемгі егісте де, күзгі орақта да жіті қимылдап үлгердік. Мұндай нәтижеге мемлекет тарапынан көрсетілген қолдау септігін тигізіп отыр.
Диқандар көңілінен шығып отырған заманауи астық комбайндары мен трактор дайындайтын компанияның өндіріс алаңында қажетті металлдарды кесіп, иіп, өңдеп, бояп, кептіретін, дәнекерлейтін заманауи станоктар бар. Осы мүмкіндіктің арқасында кәсіпорын жылына 5 түрлі комбайнның 1 000 данасын, жатканың 760-ын, одан өзге де шаруашылыққа қажетті жүздеген құрылғы шығара алады. Осы жұмысты қолға алғаннан бері 2 012 астық комбайнын, 959 трактор, 1 526 жатка және өзге де ауыл шаруашылығына қажетті құрылғыларды шығарыпты. Ауыл шаруашылығы құрылымдарының сұранысына орай трактордың 9 түрін шығаруды қолға алған. Қазір биік мақсат біршама орындалып, қуаты әрқилы 7 түрлі жаңа трактор үлгісі құрастырылып жатыр.
Кәсіпорын шаруа қожалықтарына өз өнімдерін тікелей де сатады. Шағын шаруашылықтардың мүмкіндігін ескеріп, техниканың қолжетімді болуын да қадағалайды. Бұл арадағы басты себеп – бәсекелестік. Сұранысты өтеу үшін өндіріс көлемін арттыра түсу керек. 2024 жылы №3 цехтың құрылысын қолға алуды жоспарлап отыр. Сондай-ақ металл өңдеуге заманауи станоктар да қажет. Ал дайын техниканы облыс орталығының шыға берісі мен Көкшетау-Щучье бағытындағы күре жолдың бойына орналасқан диллерлік орталықтарда шаруалардың назарына ұсынады.
Орталықта жаңа техниканың бар мүмкіндігі тегіс көрсетілмек әрі техниканы күтіп-баптау жайын да білікті мамандар ұғындырмақ.
– Көктемгі және күзгі дала жұмыстарының уақтылы, тыңғылықты атқарылуы қуатты техникаға байланысты, – дейді облыстық Ауыл шаруашылығы және жер қатынастары басқармасының басшысы Кенеш Әлімжанов, – Биыл күзгі орақ науқанында өңір диқандары 8,9 мың астық комбайнын пайдаланды. 4,8 мыңы – заманауи жоғары өнімді техника. Бір жақсысы, биыл ауыл шаруашылығы құрылымдары жалпы құны 28,5 млрд теңге болатын 246 трактор, 115 комбайн сатып алды. Жеңілдетілген несие арқылы 80 трактор, 140 комбайн, 25 әртүрлі құрылғы алынды.
2020-2021 жылдары жаман тұмау өршіген тұста компания өңірдегі ауыл шаруашылығы саласының үздіксіз жұмыс істеуіне айтарлықтай қолғабысын тигізді. Әлеуметтік жауапкершілікті жақсы сезінген ұжым техникамен қатар, материалдық көмек те көрсетті.
Компания еңбекті қорғау мәселесін назардан тыс қалдырмайды. Кәсіпорын жұмысшылары әлеуметтік жағынан толық қамтамасыз етілген. Алғашқы кезеңде 77 адам, қазір 175 адам тұрақты жұмысқа орналасқан. Әрбір жұмысшымен жеке келісімшарт жасалады. Онда тегін медициналық қызмет көрсету, денсаулығын қадағалау, дәрі-дәрмекпен қамтамасыз ету көрсетілген. Жұмысшылар тегін тамақтанады, жұмыс орнына компания көлігімен тасымалданады.
Тағы бір жақсылығы – жергілікті кәсіби білім беретін оқу орындарымен байланысын нығайтқан. Жас мамандарды тәжірибеден өткізіп, тұрақты жұмысқа орналасу мәселесін де шешеді.
Бейнеті бес батпан дала жұмыстарының бел ортасында жүрген диқан қауымының ең басты тілегі – бес қаруының сай болуы. Оның бірі әрі бірегейі – сапалы техника. Қалғаны ортақ іске деген ынта-ықылас. Ырыздық жолындағы қалың қауымды заманауи техникамен қаруландырып отырған кәсіпорынның оң ісі атап айтуға тұрарлық.
Көкшетау
