Суретті түсірген – Ерлан ОМАР, «ЕQ»
«Қазір зауытта әртүрлі өлшемдегі пластикалық құбырлар жеті өндіріс желісінен шығып жатыр. Германия, Финляндия, Қытай елдерінен әкелінген технология уақыт талабына сай өнім жасауымызға мүмкіндік тудырып отыр. Зауыт жылына 10-15 мың тонна құбыр шығарады. Өнім сапасын тұтынушы компаниялардың әлеуетіне қарап-ақ айқындауға болады. Тұтынушыларымыз елдің 20 өңірінің бәрінде дерлік бар», дейді кәсіпорын бас директоры Бағлан Құдияров.
Негізгі тапсырыс берушілер қатарында «Астана су арнасы» МКК, «Kegoc», «Қазақтелеком», «ҚазГерСтрой» ЖШС және басқа да іргелі компаниялар бар.
«Өнім мен инновацияны үнемі жетілдіре отырып, тұтынушы талабын толық орындауға мүдделіміз. Себебі кәсіпорын ұзақмерзімді дамуға бағытталған. Серіктестермен қарым-қатынасты нығайтумен қатар, жоғары деңгейде қызмет көрсетіп, қажет кезінде қолдау білдіреміз», дейді бас директор.
Компания тек өндіріспен ғана шұғылданып қоймай, елдегі орта білім ошақтарымен байланыс орнатуға тырысады. Бүгінде Астанадағы екі техникалық колледжбен меморандумға отырған. Колледж студенттері зауытқа келіп іс-тәжірибеден өтеді.
«Тәжірибеден өтуге келген 30 студенттің он шақтысы осында тұрақты жұмысқа қалып қояды. Кәсіби маман табу қиын. Пластикалық құбырлар жасауға оқытып, үйрететін білім орындары әзірше елімізде жоқ. Зауыт алғаш ашылған кезде мамандарды Финляндияға жіберіп, оқытып алғанбыз. Зауыттың жүрегі һәм ұстыны болып отырған сол сақа мамандар келген әрбір жас түлекті осындағы кәсіпке баулиды», дейді кәсіпорынның техникалық директоры Марат Сәдуақасов.
Оның айтуынша, «Polytech Astana» кәсіпорнының газбен жабдықтауға арналған құбырлары жоғары қысымға және сыртқы әсерлерге төзімділікті қамтамасыз ететін жоғары сапалы полиэтиленнен (ПЭ) жасалғандықтан, өте төзімді әрі берік. Құбырлар халықаралық қауіпсіздік және сапа стандарттарына сәйкес келеді. Ал су құбыры полиэтилен және поливинилхлоридтен (ПВХ, ПВХ-О) жасалған. Ол да аса берік, экологиялық тұрғыда таза әрі коррозияға төзімді.
«Қазір өнімге сұраныс бар. Әйтсе де, отандық үлкен компаниялар қажет құбырын Қытай немесе Ресейден алдырады. Әйтпесе біз шығаратын өнім сапасы сырттан келетін тауардан бір мысқал кем емес. Тіпті артық деуге болады. Сондықтан Үкімет қолдауы тағы ұлғайып, іргелі компаниялардың тек отандық өнімдерді сатып алуы қажеттігі белгілі бір келісімшартта анық көрініс тапса деген тілек бар», деді М.Сәдуақасов.
Тәулігіне 24 сағат тегершігі айналған зауытта жұмысшылар 4 ауысыммен еңбек етеді. 100-ден аса адам жұмыс істейді. Басым көпшілігі – техникалық, механикалық мамандық иелері. Жұмысшыларды үй мен зауыт арасына тасымалдайтын арнайы автобус бар. Бір мезгіл тегін ас беріледі. Еңбекақы көлемі 200 мың теңгеден басталып, еңбегі мен лауазымына қарай еселенеді екен.
