Мұнайлы өңір жұртшылығы Табылды Досымовтың шығармашылығына арналған «Самала саздар сағымы» атты ән байқауына куә болды. Бұл байқауға Ақтөбе, Батыс Қазақстан, Маңғыстау және Атырау облысынан 19 өнерпаз қатысты. Төрт өңірден жиналған өнерпаздар байқау шартына сәйкес гитарамен ән шырқады. Байқаудың қорытынды концерті Махамбет атындағы академиялық қазақ драма театрында өтті. Театр залы көрерменге лық толды.
«Елінің, ұлтының шынайы патриоты екенін ісімен де, әндерімен де дәлелдеген Табылды Досымовтың артына қалдырған мол мұрасы – поэзиясы мен әндері. Оның әндерін насихаттайтын ізбасарлары аз емес. Болашақта шығармаларын шырқайтын жас өнерпаздар көбейе түстеніне сенемін. Өйткені оның әндерінің астарында өмірлік мақсат, философиялық ой бар», деді облыс әкімінің орынбасары Дарын Шамұратов.
Қазылар алқасының ұйғаруымен байқаудың бірінші жүлдесіне атыраулық өнерпаз Ізбасар Самиғоллаев ие болды. Ал екінші орынға Батыс Қазақстан облысының өкілі Зибатолла Ешқаев пен жергілікті әнші Орынбасар Жұмаханов лайық деп танылды. Үшінші жүлдені Ақтөбеден қатысқан Батырбек Аманқұлов пен маңғыстаулық Серікбол Жетібаев, атыраулық Азамат Жұмағалиев иеленді.
Байқаудың қорытынды концертінде ұлы Абыл Аяш, Ұлттық ұлан ансамблінің әншісі Асхат Әмірғалиев, байқау жүлдегерлері мен өзге де өнерпаздар ән шырқады. Сондай-ақ Табылды Досымовтың өнері мен шығармашылығы арқау етілген «Самала саздар сағымы» кітабы таныстырылды.
Атырау облысы
