Атырауда 94 млн. теңгенің жалақы қарызы өтелді

АТЫРАУ. 30 қаңтар. Атырау облысы прокурорларының қадағалауымен 94 миллион теңге көлеміндегі жалақы қарызы өтелді. Бұл туралы облыстық прокуратура хабарлады. Жалақыны уақытында төлемеген жұмыс берушілердің қысастығы жайында прокуроратура органдарына ұдайы шағым түсіп тұрады. Осындай шағымдар негізінде былтыр Атырау облысында жалақы қарызы 94 миллион теңгені құрағаны белгілі болыпты. Облыс прокурорының орынбасары Серік Шалабаевтың мәлім етуінше, 3 мыңнан астам жұмысшының еңбек құқы қорғалып, жалақы қатысты проблемалық мәселелер шешімін тауыпты. Әсіресе, банкроттық қамытын киген «Атыраубалық» акционерлік қоғамы мен жұмысын тоқтатқан «АСД» серіктестігінен 500-ге жуық жұмысшысының жалақысы толықтай төлеуіне прокуроратура қызметкерлері ықпал етіпті. Сөйтіп, аталған екі кәсіпорынның жұмысшылары үшін 48 миллион теңгені құраған жалақы қарызы толық өтелген. Жолдасбек Шөпеғұл. Дерек: Атырау облыстық прокуратурасы. Сурет: Рахым Қойлыбаев.