Сурет: Қазақстан Республикасы Білім министрлігі
Чемпионатқа өңірлік деңгейде үздік атанған 555 студент қатысып, 30 құзыреттілік бойынша бақ сынады. Байқауда студенттер ақпараттық, инженерлік, өндірістік технологиялар, көлік, әлеуметтік қызметтер, дизайн және басқа да маңызды салалар бойынша өз білімдері мен дағдыларын көрсетті. Бұл чемпионаттың басты мақсаты – жұмысшы мамандықтарының беделін арттырып, еңбек нарығына қажетті жас мамандарды жұмысқа орналастыруға ықпал ету.
Чемпионат аясында қатысушылармен кездескен Премьер-министр Олжас Бектенов жастардың алған білімдері мен дағдыларының сұранысқа ие екенін атап өтіп, олардың еліміз үшін маңызды екенін айтты. «Президент жариялаған жұмысшы мамандықтар жылы техникалық және кәсіптік білім берудің бүкіл еліміз үшін ерекше маңызын көрсетеді. Үкімет алдына экономика құрылымын жаңғырту бойынша өршіл міндеттер қойылды. Ол үшін бізге энергетика, құрылысшы, ауыл шаруашылығы, көлік және су саласында білікті отандық мамандар қажет. Бұл ретте цифрлық трансформация мен технологиялық прогрестің сын-қатерлеріне дайын болу маңызды. Сондықтан біздің ортақ міндетіміз – қоғамның барлық ресурсын біріктіру. Бұл бағытта біз жастарымызға және осындай іс-шараларға жан-жақты қолдау көрсететін боламыз», деді Премьер-министр. Сондай-ақ Үкімет басшысы студенттердің кәсіби дағдыларын көрсетуіне мүмкіндік берген мамандандырылған аймақтар құрған компанияларға алғысын білдірді.
Оқу-ағарту министрі Ғани Бейсембаев «WorldSkills Kazakhstan» чемпионатын тек кәсіби байқау ғана емес, жұмысшы мамандықтарының беделін арттырып, экономиканың тұрақты дамуына ықпал ететін маңызды алаң деп бағалады. «WorldSkills» қозғалысын дамыту арқылы біз халықаралық аренадағы позициямызды нығайттық. «WorldSkills» тек беделді байқау ғана емес, сонымен бірге жұмысшы мамандықтарының мәртебесін арттыруға және кәсіби еңбектің маңызын дәріптеуге бағытталған маңызды алаң. Бұл қозғалыс еліміздің тұрақты экономикалық өсуі мен технологиялық прогреске қол жеткізуі үшін қажетті кадрлық әлеуетті қалыптастыруда айрықша рөл атқарады. Салалық министрліктермен ынтымақтастық арқылы біз еңбек нарығында сұранысқа ие мамандарды даярлап, оларды жұмыспен қамтуға жағдай жасаймыз», деді Оқу-ағарту министрі.
«Талап» КеАҚ президенті Санжар Тәтібековтің айтуынша, студенттер осы алаңда өз қабілеттерін көрсету арқылы еліміздің адами капиталын арттыруға үлес қосады. «Біздің алаң өз дағдыларымызды көрсете отырып, Қазақстанның адами капиталын арттыруға қатысуға дайын екенімізді білдіреді. Біз ТжКБ жүйесіне «WorldSkills International» стандарттарын енгіземіз, тиісті оқыту арқылы педагогтердің біліктілігін арттырамыз. Сондай-ақ стандарттар демонстрациялық емтихан өткізу арқылы білімді қорытынды бақылау кезінде қолданылады», деді ол.
Чемпионат қорытындысы бойынша 108 жеңімпаз анықталды. Жеңімпаздар 32 алтын, 37 күміс және 39 қола медаль иеленді. 155 қатысушы «Үздік медальонға» ие болды. Командалық есепте Астана қаласы мен Абай облысының құрама командасы көш бастады, екінші орынды – Алматы қаласы және үшінші орынға Қарағанды облысы ие болды.
Айта кетейік, республикалық кезеңнің жеңімпаздары келесі жылдың 9-13 қыркүйегі аралығында Данияда өтетін «EuroSkills-2025» халықаралық чемпионатында еліміздің намысын қорғайды.
