Солтүстік Қазақстан полицейлеріне 45 көлік табыс етілді

ПЕТРОПАВЛ. 30 сәуір. Солтүстік Қазақстан облысында Ұлы Жеңістің 70 жылдығына арналған іс-шаралар аясында тәртіп сақшыларына қызметтік көліктердің кілттері салтанатты жағдайда тарту етілді. Бұл туралы облыстық ішкі істер департаментінің баспасөз қызметі хабарлады. «Ішкі істер саласының материалдық-техникалық базасын нығайтудың арқасында қылмыстар мен құқықтық бұзушылықтардың алдын алу, болдырмау шаралары өз нәтижелерін беріп келеді. Өздеріңіз көріп тұрғандай, облыстық жол-патрульдік полиция құрылымы 45 қызметтік көлікпен толығып отыр», – деді өз сөзінде облыс әкімінің орынбасары Владимир Бубенко. Škoda Octavia, Lada Granta, «Нива», УАЗ секілді автомобильдерді сатып алуға жергілікті қазынадан 80 миллион теңге бөлінді. Бұдан бөлек, Қорғаныс министрлігі қызметтік мақсаттар үшін екі автобус бөлді. Ал бұған дейін қалалық, облыстық тас жолдарда пайдаланылып келген автомобильдер учаскелік полиция сақшыларына берілді. Салтанатты жиын аяқталғаннан кейін қонақтарға арнайы бөлімше сайыс ұйымдастырып, қаруды меңгеру әдістерін көрсетті. Шара ішкі істер органдары қызметкерлерінің салтанатты маршымен аяқталды. Өмір Есқали. Дерек: облыстық ішкі істер департаментінің баспасөз қызметі. Сурет: inform.kz.