Иә, негізі мұны кез келген кәсіби педагог терең түсінеді. Алайда кейде сол ізденісте жүрген жанның өзі қолдауға мұқтаж болады. Бұл – ең алдымен кәсіби қолдау. Біз «Өрлеу» ұлттық біліктілікті арттыру орталығының атынан ерекше қажеттілігі бар балаларға білім беретін интернаттар, мектептер, оңалту орталықтарының педагогтеріне, педагог-ассистенттерге психологиялық-педагогикалық жағынан қолдау көрсетеміз. Сонымен қатар институтымызда теориялық тұрғыда бағыт-бағдар берсек, кейін ресурстық мектепте сол алған білімі мен жиған тәжірибесін іс жүзінде қалай қолдану керегін айтып, 10 күн бойы таңнан кешке дейін тәжірибелік дәрістер өткіземіз. Осыған қоса аудандардан келген тыңдаушыларға қаладағы мектептерді аралатып, өзіне қажетті, өзі жұмыс істейтін салаға сай арнайы мамандардың – дефектологтер, логопедтер, педагог-ассистенттердің сабағына қатыстырып керегін үйренуге мүмкіндік береміз. Содан соң осындай толық теориялық, одан әрі практикалық курстан өткендер еңбек ететін ұйымына барып білімін, тәжірибесін өзге әріптестеріне бөліседі. Сондай сәтте біз сол курсымызды бітірген мамандарды курстан кейінгі қолдауға көшеміз. Мұндай қолдауды алу үшін мамандар арнайы сайтқа тіркеліп, курстық жұмыс өткізіп, ашық сабақтарын жүргізуге қатысты толыққанды қолдау ала алады, соңында есебін тапсырады. Сайт арқылы осындай курстан өткен педагогтер өздерінің ашық сабақтарының видеоларын жүктеп, өзара пікір алмасып, республика көлеміндегі әріптестерімен кеңінен талқылай алады.
Екінші – әріптес ретінде жанашырлық танытып, психологиялық тұрғыдан қолдау. Шындығында қолдаудың бұл түрі бірінші айтылмағанымен, өте маңыздысы. Өйткені шынайы білгенін айту, бөлісу, өзінің білгенін әріптесінің де білгенін қалау, психологиялық қолдау дәл осы жанашырлықтан туады. Сол себепті біз осы мәселені өзіміз де ұмытпауға тырысамыз әрі курс оқытатын әріптестердің де, курс оқуға келген тыңдаушылардың да есіне салып отырамыз. Бәріміз білетіндей, дамуы қалыпты баланың өзімен жұмыс істеу – оңай емес, ал психологиялық немесе физиологиялық, тіпті психикалық жағынан қандай да бір кешеуілдеуі, бұзылысы бар баламен жұмыс істеу – педагогтен әдеттегіге қарағанда екі есе көп күш-жігерді, ізденісті, кәсібилікті қажет етеді. Сондықтан да ерекше балалармен жұмыс істейтін педагогтерге ерекше қолдау керек.
Айгүл ҚОЗБАХОВА,
«Өрлеу» БАҚО АҚ филиалы Қызылорда облысы бойынша Кәсіби даму институты кафедрасының аға оқытушысы
