Суреттерді түсірген – Игорь Бургандинов
Нақты деректерге сүйенсек, осынау жобалардың жүзеге асуына себепші болып отырған «Даму» қоры Астанадағы шағын және орта бизнестегі кәсіпкерлерге жалпы сомасы 69,6 миллиард теңгемен қаржылай қолдау көрсеткен. Оның қатарында, субсидиялау құралы бойынша кәсіпкерлердің 57,1 миллиард теңгеге 998, кепілдік беру ұстанымымен 12,5 миллиард теңгеге 660 жобасы мемлекеттен қолдау алды. Ал 146 жоба 11,3 миллиард теңгеге жеңілдікпен несие алуға қол жеткізген.
«Даму» қоры шағын және орта бизнеске субсидия мен кепілдік беріп, жеңілдікпен қаржыландырады. Субсидия кәсіпкер несиесінің пайызын азайтады. Нәтижесінде, кәсіпкерлер үнемделген қаражатпен ісін әрі қарай дамытуға жұмсай алады. Ал бизнес ашуға немесе кәсібін дамытуға несие аларда банк талап еткен кепілмүлік аз болған жағдайда қор кепілдігі көмектеседі.
«Шағын және орта кәсіпкерлікті қолдау бойынша мемлекеттік саясат аясында, ұлттық даму институты ретінде «Даму» қоры өңірлердегі кәсіпкерліктің дамуына барынша ықпал етеді. Ол өз кезегінде экономикалық дамуға елеулі әсер етеді. 2010 жылдан қазірге дейін өңірімізде мемлекеттік қолдауға ие болған кәсіпкерлер 17,5 мың жұмыс орнын ашып, мемлекетке 651 миллиард теңге салық төледі», деді «Даму» қорының Астана филиалы директоры Светлана Назарюк.
Таяуда «Даму» қорының ұйымдастыруымен өткен пресс-турда БАҚ өкілдері Астанадағы әлеуеті зор төрт бірдей кәсіпорын жұмысымен танысты.
«Анель» жеке кәсіпкерлігі 2018 жылдан бері «Gastronomy LAB» брендімен пайдалы нан-тоқаш өнімдерін өндіріп келеді. Кәсіпкер Анель Камалқызы ашқан «Gastronomy LAB» нан өндірісінде жиі кездесетін жасанды ашытқысыз, консервантсыз және басқа химиялық қоспаларсыз пісіреді. Наубайханада нан өндірудің бүкіл үдерісі тірі ашытқыны қолдана отырып, ұзақ табиғи ашыту әдісіне негізделген. Бұл нанға ерекше дәм мен текстураны алуға ғана емес, сонымен қатар сапаны жоғалтпай ұзақ сақтау мерзімін қамтамасыз етуге мүмкіндік береді.
Қазір компанияда 8 адам жұмыс істейді. Кәсіпкер биылғы жылы өндірісті кеңейтіп, наубайхана цехына жаңа жабдық сатып алу үшін «Банк ЦентрКредит» АҚ-дан несие алды. «Даму» қоры несие пайызын субсидиялап, кепілдік беру арқылы қолдау көрсеткен.
«Соулфлай» жеке кәсіпкерлігі өз қызметін 2016 жылы бастаған екен. Компания полистиролдан жасалған сәнді люстралар, шайыр тұтқалары, кофе үстелдері және антикварлық айналар өндірісімен айналысады. Бизнесті ерлі-зайыптылар жүргізеді. Олар барлық өнімді өз қолдарымен жасайды.
Компания бастапқыда жалға алынған ғимаратта жұмыс істеген. Алайда бизнестің кеңеюіне байланысты дизайнерлік бұйымдарды өндіру үшін жеке ғимарат сатып алды. Ол үшін кәсіпкерлер «Банк ЦентрКредит» АҚ арқылы несиеге тиімді несиеге қол жеткізді. «Даму» қоры несие пайызын субсидиялау арқылы жәрдемдесті.
Әлия Ғалиева ашқан «Ocean child» жеке кәсіпкерлік те екі жылдан бері балаларға қолжетімді және инклюзив кеңістік құрумен айналысады. Компания денсаулықты нығайтуға, иммунитетті сақтауға, сондай-ақ балалардың жағымды әдет-әдебін қалыптастыруға ықпал ететін жүзу мен массаж қызметтерін ұсынады. Компания жұмысының маңызды бағыты – дені сау балаларға ғана емес, ерекше қажеттілігі бар балаларға да қол жетімді қызмет ұсыну. Қазір компанияда 11 адам жұмыс істейді. Қызмет көрсету сапасын арттыру мен өсіп келе жатқан сұранысты қанағаттандыру мақсатында жұмыс тобын, оған қоса қажетті инфрақұрылымды одан әрі кеңейтуді жоспарлап отыр.
Компания «First Heartland Jusan Bank» АҚ арқылы несие алып, өзіне қолайлы ғимарат сатып алуға қол жеткізді. Өз кезегінде «Даму» қоры несие пайызын субсидиялап, жұмысын одан әрі өрістетуіне қолдау білдірді.
