Әлемде дауыспен ақша басқару мен төлем технологиялары қарқынды дамып келеді. Осы технологиялар мобильді банк қызметтерінен бастап, ақылды құрылғыларға дейін әртүрлі салаларда қолданылып жүр. Қазірдің өзінде «Apple Siri», «Amazon Alexa», «Google Assistant» сияқты виртуалды көмекшілер шоттарды төлеу, қаражатты аудару, қаржылық кеңестер беру сияқты қызметтерді дауыспен басқарады. Мысалы, «Royal Bank of Canada» мен «Barclays» сияқты банктер қаржы үдерістеріне енгізген. Жоғарыда айтқанымыздай, мұның ауылы бізден де алыс емес. Енді бізде банк қосымшасындағы дауыстық басқару жасанды интеллект басқаруымен жұмыс істейтін болады. Мамандар қазірдің өзінде үлкен тілдік модельдердің белсенді тесттер сериясына көшті.
– Мысалы, сіз жай ғана қосымшаға кіріп, «10 000 теңге Айжанға аударылсын» десеңіз, жүйе барлық Айжан атты контактілерді сізге ұсынады. Сіз аударым жасау керек біреуін таңдайсыз. Біз бұл мүмкіндікті «Halyk SuperApp»-та жүзеге асырғымыз келеді. Жүйе тіпті пайдаланушының деректерінен үйреніп, белгілі бір жазылымға немесе қызметке ақы төлеудің уақыты келгенін түсінеді. Адамды қажетсіз әрекеттерді жасауға мәжбүр етпестен өз бетінше жасауды ұсынады. Сондай-ақ біз жеке қаржылық жоспарлауды қосамыз, осылайша әркім өз шығындарының аналитикасын көреді, – дейді А.Заварзин.
Әлбетте, бұл технологиялар қаржылық қызметтердің қолжетімділігін арттырып, уақыт үнемдейді. Бірақ оны жаппай қабылдамас бұрын, қауіпсіздік пен сенімділікке сақ болу қажет. Себебі қауіпсіздік мәселесі, тілдік ерекшеліктерді түсінудегі қиындықтар, «POS» құрылғыларымен үйлесімділік мәселелерінен айналып кете алмаймыз. Бірақ IT құрылғыларының таралуы мен жасанды интеллектінің дамуы арқасында бұл технологияның болашағы зор болуы мүмкін.
