Тарихи тұлғаның мерейтойы аясында өткізілген көрме Ұлттық ғылым академиясында орналасқан Қ.Сәтбаевтың мемориалды музейі және 1999 жылы академик есімімен аталған Satbayev University тарихи музейімен бірлесіп ұйымдастырылды. Ашылу салтанатына Қ.Сәтбаевтың жиені, геология-минерология ғылымдарының докторы Александр Третьяков та қатысып, алты жасына дейін қасында еркелеп өскен атасы туралы естеліктер тиегін ағытып, өмірлік мақсатын белгілеуіне ықпалы болған ұмытылмас тұлғаны ықыласпен еске алды.
Ұлттың біртуар перзентінің рухына тағзым жасап келгендер гиперреалист мүсінші Айдос Есмағамбетовтің «Қаныш Сәтбаев» атты силиконнан жасаған тың туындысына бірден назар аударды. Академик Қаныш Сәтбаевтың мұрасы Қазақстанның ғылым және білім тарихында маңызды орын алады. Екі экспозициялық бөлімнен тұратын көрмеде ғалымның жеке заттары мен жеке мұрағаты ұсынылған. Жазу мәшіңкесі, кітап картотекасы, мемлекеттік наградалары, домбырасы, геолог ғалымның ізденісімен табылған, бірегейлігімен және ерекше түсімен көз тартатын аметист, хольказин, вольфрамит сияқты табиғи минерал тастары, сондай-ақ Қ.Сәтбаевтың геологиялық қазба жұмыстарында қолданған қайласы, балта, балғасы, жел мен күннің өтінде жүріп ақжемге айналған қара былғары күртесі, етігі, портфелі ғылым жолында жанкешті ғұмыр кешкен ғалымның өткен өмірін бір сәтке көз алдына әкеліп, тарихи тұтастықта баяндайды.
Көрмеге геология және металлогения саласындағы зерттеулерін қоса алғанда, отандық ғылымды одан әрі дамыту үшін негіз болған ғылыми жетістіктеріне арналған мұрағаттық фотосуреттер, құжаттар мен мақалалары, ғылыми еңбектері, басқа да материалдар өткен күннен сыр шертеді. Елімізде геология мен металлургияны дамытуда шешуші рөл атқарған көрнекті ғалым Қ.Сәтбаевтың өмірі һәм қызметімен, ғылыми жетістіктерімен және отандық ғылымның дамуына қосқан үлесімен танысуға кең мүмкіндік береді.
АЛМАТЫ
