Сәлем, Жеңіс!

Екінші дүниежүзілік соғыста фашистердің құрсауында қалған Ленинград қаласының азат етілгеніне қаңтардың соңғы күндерінде 71 жыл толды. Шымкенттегі М.Дулати атындағы №8 мектеп-гимназия ұжымы осы датаға орай Ұлы Отан соғысының ардагері Анна Шаля мен уа­қытында осы мектептен тәлім алған, өзі сұранып майданға аттанған, Ленинград қоршауында бар ауыртпалықты көрген майдангер Таисия Медведеваны шақырып, әңгімелерін тыңдады. «Күндік асқа 125 грамм нан беріледі, жылу мен электр энергиясы жоқ. Аспаннан жаң­­­­­быр­дай жауған оқ, ыңыранып келіп үй аума­­ғын­дай жерді аспанға атқан ауыр снаряд­тар, талқаны шыққан қала, қырылып жат­қан адамдар, шыбын жанын қайда қоярын білмей құ­­лындаған дауысы құраққа шыққан бала-шаға...». Майдангерлер қоршауда қалған қала, өліспей беріспеске бекініп, ұрыс салған ­жауынгерлер, майдан кептерлері жайлы әңгіменің тиегін ағытты. Соғыс біткеніне 70 жыл болса да зұлмат жылдар салған жарақат жүректен кетпек емес, деді олар. Өрімдей жастық шағы ел басына күн туған уақытқа дөп келген қос майдангердің бүгінгі ұрпаққа айтары көп еді. Ленинградтықтар сол бір қиын күндерде өшпес ерліктің үлгісін танытқан. Кездесуге арнайы қатысқан облыстық жасөспірімдер туристік стансасының өрендері Санкт-Петербургке жақын орналасқан, қоршауда қырылып, жаппай жерленген Пискарев мемориалды қорымынан бір шөкім топырағы бар құты капсула ала келіпті. Оқушылар ерлікпен қаза тапқан майдангерлерді, азаматтарды бір минут үнсіздікпен еске алып, құрмет көрсетті. Оқушылар соғыс кезіндегі әндерді айтып, би биледі. Ұлы Жамбылдың қоршаудағы қала тұрғындарына арнаған “Ленинградтық өрендерім” сияқты өршіл өлеңдерді оқыды. “Біз соғысты көрген жоқпыз. Атала­рымыздан естідік, кинолардан көрдік. Миллион­даған адамды қазаға ұшыратқан соғыста жеңімпаздар болмайды. Отанымыз аман болса екен. Халқымыз бақытты болса екен. Біз бейбітшілікті қолдаймыз”. Жасөспі­рімдердің пікірі осыған сайып жатты. – Сендер бақыттысыңдар, – деді Таисия Медведева. – Бейбіт уақытта дүниеге келдің­дер. Соғыс салған өртті құдайым сендерге көрсет­пей-ақ қойсын. Жеңіс күнін жақындатқан­дар­ды ұмытпаңдар және Қазақстандай қуатты мемлекеттің ұл-қыздары екендіктеріңді мақтаныш етіңдер. Көкөрім шағында қан майданға түскен ардагерлердің батасы осы. Бақтияр ТАЙЖАН, «Егемен Қазақстан». ШЫМКЕНТ.