Өндіріс жоспары ойдағыдай орындалды

Өңірде шағын және орта биз­несті қолдау жалғасып жатыр. «Бизнестің жол картасы – 2025» бағдарламасы аясын­да 10 айда 12,3 млрд теңге бө­лініп, 1000-ға жуық ШОБ субъек­тісі қолдау тауып, 529 жаңа жұмыс орны құрылды. Оның қатарында, несие сомасы 31,4 млрд теңгені құрайтын 634 кә­сіпкердің пайыздық мөл­шер­лемесі субсидияланып, 318 кә­сіпкердің жобасы 10,2 млрд теңгеге кепілдендірілді.

Мемлекет басшысының ба­­тыс­та мұнай-газ-химия өнер­­кәсібі кластерін дамыту жө­ніндегі тапсырмасы аясында жы­лына 1,25 млн тонна полиэти­лен өндіре­тін «Силллено» зауыты мен жылына 1 млрд текше метр газ өнді­ре­тін Ескенедегі зауыт­тың құры­лысы жүргізіліп жатыр. Алдағы уақытта бута­диен, син­тетикалық каучук шы­ға­ратын «Бутадиен» зауыты газ бөлу кешенінің құрылысы бас­талады.

Облыста агроөнеркәсіп кешені саласында да оң динамика байқалады. Биыл ірі қара мал басы көбейіп, саны 223,8 мыңнан асты. Үй құстарының саны да 2 есе өсті. Осы жылы ауыл шаруашылығы саласын дамыту бағытында 3 инвестициялық жоба іске қосылып, 90 жұмыс орны құрылды. Ал келер жылы құны 26,2 млрд теңге болатын 4 жобаны іске асыру жоспарланып, 187 жұмыс орны пайда болады деген үміт бар.

Мемлекет басшысы тапсырмасымен бастау алған «Ауыл аманаты» жобасы да өңірде жүйелі түрде іске асырылып жатыр. Бұл үшін бюджеттен 761 млн теңге қаралып, 83 жоба қолдау тапты. Сондай-ақ, өңірде 49 мыңнан аса азамат жұмыспен қамту шараларына тартылды. Он айда 31 374 жұмыс орны ашылса, оның 21 мыңнан астамы – тұрақты.

Облыстың ағымдағы жылдың 10 айындағы әлеуметтік-эко­номикалық даму қорытын­дысына байланысты баспасөз брифингінде Серік Шәпкенов әлеуметтік саланы дамыту­ға қатысты атқарылған жұмыс­қа кеңінен тоқталды. «Биыл Атырауда 7 жайлы мек­теп­тің құрылысы жүріп жатыр. Келер жылы 6, арғы жылы 3 мектеп пайдалануға беріледі. Биыл 4200 орындық 3 мектеп ашылды. Алдағы екі жылда 27 мектептің құрылысы аяқталады. Нәтижесінде, өңірдегі 9 үш ауы­сымдық 4 апатты мектептің мә­селесі түбегейлі шешіледі», деді өңір басшысы.

Биыл «Ауылда денсаулық сақтауды жаңғырту» ұлттық жобасы аясында 4 медициналық ғимарат пайдалануға берілді. Жыл аяғына дейін 12, келер жылы 2-еуінің құрылысы аяқталады. Бұдан бөлек, биыл жергілікті бюджет есебінен 7 нысан тұрғызылды.

Өңірде жиі талқыға түсетін тақырыптың бірі – дәрігер тапшылығы. Аймаққа өзге өңірден білікті және оқуын енді аяқтаған жас мамандарды тартуға бір реттік үстемақы тағайындалды. Оның көлемі өткен жылмен салыстырғанда 2 есеге көтерілген.

Сонымен, ауылдық жерге барып жұмыс істеуге келіс­кен дәрігерге 10 млн, аудан орталығында қызмет етемін дегендерге 8,5 млн теңге, ал облыс орталығында еңбек еткісі келгендерге 5 млн теңге көмек көрсетілді. Нәтижесінде, осы жылы 140 дәрігер жұмысқа қабылданды.

Өңірде спортпен шұғыл­дана­тын балалар саны артып келеді. Аймақта балаларды спортқа бау­лу жұмыстары қарқынды жүр­гізілуде. Қазір өңірде спорт­тық 17 секцияға 22 мыңнан аса бала қатысады. Бұл өткен жылмен салыстырғанда  75,7%-ға өсті. Келер жылдан бастап саланы цифрландыру жоспарланды.

Жалпы, Атырау облысын­да тас жолдың ұзындығы 1927 ша­қырымды құрайды. Был­тыр өңірдегі жолдың қанағат­танарлық деңгейі 76 пайызды құраса, бүгінде бұл көрсеткіш 78%-ға жетті. Биыл 312,8 шақы­рымға жол төселді.

Көктемдегі су тасқынына қа­рамастан, халықты сапалы ауызсумен қамту бағытында бас­талған жұмыс жүйелі жүр­гі­зілді. Облыста ауызсумен қам­ту және су бұру жүйесін жақ­сарту бағытында ауқымды істер қолға алынды. Жалпы, өңір хал­қының 99,8%-ы таза ауыз­су­мен қамтылған. Биыл Қы­­зыл­қоға ауданының Қоңы­рау­лы, Аққора ауылдары мен Ма­хам­­бет ауданының Бала Ораз ел­ді мекеніне 18,9 шақырым су құбы­ры жүргізіліп, 600 тұрғынға таза ауызсу жеткізілді. Бұдан бөлек, Махамбет, Исатай, Құр­манғазы ауданында 16 су тазарту стансасы қайта жаңғыртылып жатыр.

Сонымен қатар Атырау қа­ласында тәулігіне 50 мың текше метр су тазалайтын №5 сүзгі стансасын жаңғырту аяқталып келеді. Келер жылы тәулігіне 60 мың текше метр су тазалайтын №6 сүзгі станса­сының құрылысы басталады. Бұл стратегиялық маңызды нысандар арқылы алдағы бес жылда су тапшылығы мәселесі толық шешіледі.

Исатай ауданы Аққыстау ауы­лында кәріздік тазарту ғима­ратының құрылысы жүр­гізіліп жатыр. Ал Құлсары қаласында 13 кәріз сорғы стансасы күрделі жөндеуден өтті. Одан бөлек, 1950 жылдан бері жөндеу көрмеген 40 шақырым кәріз желісі жаң­ғыртылуда, оның 17 шақы­рымында жұмыс аяқталды.

Ал Атырау қаласында 1945 жылдан бері жөнделмеген кәріз стансаларын жаңғырту мен күр­делі жөндеу жұмысы бас­тал­ды. 9 кәріз сорғы стансасы жаңар­тылып, жыл соңына дейін 5-еуіндегі жұмыс мәресіне жетеді. Оған қоса 36 стансаны реконструкциялау үшін жобалық сметалық құжат дайындалып жатыр.

Жыл басынан бері өңірде ЭЧ-4 мекемесіне қарасты 160,9 шақырым электр желісі ауыс­тырылып, 54 000 тұтынушыға жарық тұрақты түрде беріле бас­тады. Оған қоса, «Атырау Жа­рық» АҚ инвестициялық жобасы аясында 742 шақырым электр желісі жөнделді.

Аймақ тұрғындарының газбен қамту көрсеткіші – 99,8 па­йыз. Ұзындығы 122 шақырымды құрайтын газ желісі жүргізіліп, 6 елді мекеннің халқы көгілдір отынмен қамтылды. Өңірде ұзындығы 46,8 шақырым ма­гистралдық газ құбырының 21 шақырымы тартылды. Жұ­мыс келер жылы аяқталады. Нәтижесінде, 160 мыңнан астам адамды құрайтын қала мен қала маңындағы елді мекендер, кәсіпкерлік субьектілер тұрақты газ жылуын пайдаланатын болады.

Биыл облыстық экология департаменті өңірдегі эко­логиялық заңнаманың сақта­луын бақылау үшін 27 тексеру жүргізіп, 149 әкімшілік іс қоз­ғады. Экологиялық талаптарды бұзған мекемелерге барлығы 32 млрд теңге көлемінде айыппұл салынды. Атмосфералық ауаға та­райтын газдың, басқа да зиян­ды мөлшерін азайту мақса­тында биыл 419,5 га орман алқабына 965,7 мың дана жас көшет егілді. Сондай-ақ қала мен елді мекендер ішіндегі 52,3 га жерге 78,9 мың тал егілді. Осындай игі ша­ралардың арқа­сында, аймақта ауаға шыға­ры­латын эмиссия көлемі де азайып келеді.

Аймақ басшысы Серік Шәп­кенов көктемдегі су тас­қыны кезінде атқарылған жұмыстарға арнайы тоқталды. Бұл ретте Жайық жағалауына 590 шақы­рым бөгет салыныпты. 30 шақы­рым ка­нал тазартылып, қажет жері тиіс­ті деңгейде қайта қа­зылған.

Жайықтың Каспийге құяр сағасында судың өтуін жақсарту үшін 10 шақырым өзен табаны тереңдетілді. Оған 4 мыңға жуық техника жұмылдырылып, 25 мыңнан аса азамат осы елдік істе еңбек етті. Оның 1 мыңнан астамы – әскер сапындағы жауын­герлер.

Облыста тұрғызылған бө­гет­тер мен гидроқұры­лыстарды күтіп ұстауға «Та­биғат» мекемесі құрылды. Тасқынның алдын алу бағы­тында Жылыой ауданында да бірқатар жұмыс атқарылып жатыр. Нақтырақ айтқанда, Құр­сай өзегі мен Жем өзенінің 95 шақырымында су табанын тереңдету жұмысы жүргізілді. Бүгінге дейін 43 шақырымы тазаланып, тереңдетіліп болған.

Жылыой ауданында Құлсары қаласын, Шақпартоғай, Тұр­ғызба және Ақкиізтоғай ауылдарын қорғайтын бөгеттер салынады. Ұзындығы 6,6 шақырым болатын Күржем арнасын, Қамыскөл мен басқа көлдерді тазалау ісі жос­парланып отыр. Арналардағы су өткізетін құрылғылар толық дерлік реконструкцияланады.

Қаңтардан бастап Атырау облысының жедел штабы өз жұмысын қайта бастайды, ол су тасқынының алдын алу бойын­­ша барлық шараларды үйлес­тірумен айналысады.