Қош, аға, баспасөздің қарт қыраны

Қазақ баспасөзінің ардагері, қарт қаламгер, белгілі журналист Саламат Хайдарұлы 96 жасқа қараған шағын­да дүниеден озды. Қазақ қоғамы ­бастан кешкен қилы заманның куәгері болған, күрделі тағдыр иесі Саламат Хайдарұлы өзінің бар саналы ғұмырын әділет сөзін айтып, ақиқаттың үнін жеткізуге арнады. Соғыс жылда­р­ында Қазақстан Жазушылар одағының батыс облыстардағы өкілі болды. 10 жыл бойы республикалық «Социалистік Қазақстан» газетінің Маңғыстау облысындағы меншікті тілшісі қызметін абыроймен атқарды. Жыр алыбы Жамбылмен кездесу бақытын еншілеген, қазақ әдебиетінің нар тұл­ғалары Сәбит Мұқанов, Асқар Тоқмағамбетовтармен қызмет бабында тығыз байланысқан. Солардың әсерімен өзі де әңгіме, хикаяттар жазған. Әр кезеңнің суретін сипаттайтын публицистикалық шығармалары мен әдеби туындылары Саламат ағаның 2 томдық шығармалар жи­на­ғында топтастырылды. Оның әдебиетіміз пен журна­листикамыздың үлкен тұлға­лары Зейнолла Қабдолов, Тау­ман Амандосовтарға ұстаздық етуінің өзі бір өнеге іспеттес. Ел газеті «Егеменмен» түйдей құрдас Саламат аға өмірінің соңғы күндеріне дейін кезінде өзі қызмет еткен сүйікті басылымымен байланысын үзген жоқ. Қашанда газеттің жарық көрген әр санын мұқият оқып, хабарласып тұратын. Алдыңғы буын өкілі ретінде ақылы мен ұсынысын, шынайы көңілі мен ақ батасын кейінгі ұрпақтан аямай, қалам ұстаған жастардың санасында абыройлы ақсақал ретінде қала білді. Газетіміздің 90 жылдық мерейтойында аталы сөз арнап, құрметті төрден батасын берген абыз ардагеріміз еді. «Егемен Қазақстанның» 95 жылдығына денсаулығына байланысты қатыса алмаса да, балаша қуанып, ақ тілегін арнаған-ды. Енді міне, қарт журналистің жүрегі соғуын тоқтатса да, қазақ баспасөзінің шежіресінде оның өзіндік өрнекті ізі қалды. Елжіреп «Егеменге» жүрегіңіз, Ішінде қарашаңырақ түледіңіз. Оқытса Амандосов баршамызды, Тауманға сабақ берген сіз едіңіз. Қош, аға, баспасөздің қарт қыраны, Көрмеген қылдан тайып сертті ләмі. Құрдасы ел газеті «Егеменнің», Жүрегі – ізгіліктің ақ бұлағы. Редакция  ұжымы марқұм ­Са­ламат Хайдарұлының қаза­сына көңіл айтып, артындағы ұрпа­ғына баянды өмір тілейді. Ар­дагер ақсақалдың рухына қи­мастықпен соңғы «қош-қошы­мызды» айтамыз.  «Егеменқазақстандықтар».