Мерейтойға білім беру саласының өкілдері, педагогикалық еңбек ардагерлері, колледж түлектері мен қала қонақтары келіп, оқу орнының тағылымды тарихына тағзым етіп, жылы лебіздерін білдірді.
Мерекелік шаралар колледж жанындағы Б.А. Ахметовтің ескерткішіне гүл шоқтарын қою рәсімінен басталды.
Бұл рәсім – көрнекті ұстазға деген құрмет пен оның білім саласына қосқан үлесіне деген ілтипаттың белгісі.
Айтулы күн аясында «Музыкалық тәрбие әдістемесі» кабинетіне Павлодар өңірінің педагогикалық еңбек ардагері, композитор әрі мәдениет қайраткері Қайырбек Сатиевтің есімі берілді. Бұл қадам ардагерлердің еңбегін ұлықтаудың жарқын үлгісіне айналды.
Колледж оқытушылары дайындаған жаңа оқу құралдарының тұсаукесері және заманауи «SKILLSBOOST CENTER» кабинетін ашу шаралары оқу орнының білім берудегі жаңашыл көзқарасын көрсетті.
Студенттер өздерінің кәсіби шеберлігін іс жүзінде көрсетіп, ашық сабақтар ұйымдастырды. Бұл – оқу орнының сапалы білім берудегі биік нәтижелерінің айғағы.
Мерекелік іс-шара М.М. Катаев атындағы Оқушылар сарайында жалғасып, педагогикалық еңбек ардагерлері мен түрлі жылдардағы түлектер колледжді мерейтойымен құттықтады.
Қонақтар мерекелік концертті тамашалап, колледждің еңбегі сіңген ұстаздарына құрмет көрсетіліп, арнайы марапаттар табысталды.
Айта кетсек, қараша айынан бастап Ахметов атындағы колледждің 95 жылдығы аясында түлектер, ардагер ұстаздар, оқытушылар мен студенттердің кездесулері өтті.
Әр бөлім студенттік шақтың жарқын сәттерін еске түсіріп, ұстаздарымен қауышты.
Кездесулер колледждің білікті мамандар даярлаудағы маңыздылығын айқындады.
Б.Ахметов атындағы жоғары педагогикалық колледж – сапалы білім мен жаңа буын көшбасшы мамандарды даярлайтын Қазақстандағы жетекші оқу орындарының бірі.
Оқу орны 95 жыл бойы ел дамуына үлес қосып келе жатқан білікті педагогтерді даярлаудың үлгілі ордасына айналды.
