Коллажды жасаған – Зәуреш СМАҒҰЛ ,«EQ»
Облыс әкімінің орынбасары Жасұлан Бисембиевтің айтуынша, сібір жарасы анықталғаннан бері облыстық санитарлық-эпидемиологиялық бақылау департаментінің мамандары шаһардағы базарлар мен түрлі сауда нүктесінен, оның ішінде ет өнімдері сақталатын, сатылатын орындардан, малды сою, тасымалдау кезінде қолданылатын құрал-жабдықтардан, арнаулы жұмыс киімдерінен, сойылған малдың ашасынан 700-ден астам сынама алды. Сынамалар бес мал базарындағы қасапханалардан, топырақ құрамынан, жемнен, басқа да биоматериалдардан алынып, 66 нысанда зерттеу жұмыстары жүргізілді.
«Атырау қаласына кірер тұста ветеринарлық бақылау жүргізетін 4 қадағалау бекеті қойылды. Бекеттерде полиция мен ветеринар мамандар тексеру жүргізеді. Мамандар малдың жұқпалы ауруға қарсы егілгені туралы құжатты тексеріп, дене қызуын бақылайды. Мәселен, 20–25 қараша аралығында союға мал әкеле жатқан 30 көліктің қалаға кіруіне тыйым салынды. Өйткені бұл көліктердегі 838 ұсақ малдың, 192 ірі қара мен 16 жылқының тиісті құжаттары толық болмай шықты. Кейбір малдың құлағындағы сырғасының нөмірі өше бастаған, кейбірінің құжаты қате толтырылған», деп мәлімдеді Ж.Бисембиев.
Әкім орынбасарының дерегіне сүйенсек, өлген сиырдың екеуі Батыс Қазақстан облысынан, ал біреуі Атырау облысындағы Құрманғазы ауданынан әкелінген. Мамандар екі сиырдың өлімтігінен 2 рет сынама алып, зертханалық талдау жүргізді. Талдау қорытындысында сібір жарасы анықталды. Үшінші сиыр ауруды мал сою бекетінен жұқтырған болуы мүмкін екені айтылып отыр.
«Жалпы, Атырау қаласына ірі қараның 80 пайызы Батыс Қазақстан облысынан тасымалданады. Облыстың аудандарынан союға мал әкелетін кәсіпкерлер бар. Карантин талабына сәйкес союға әкелінетін малдың құжаты болуы қажет. Бірақ мұны ескермейтін кәсіпкерлер бар. Кейінгі 5 күнде сатуға, союға мал әкелген 19 кәсіпкерге айыппұл салынды. Себеп – малдың құжаты толық емес немесе дұрыс емес. Ал «Асыл-Агро» шаруа қожалығының мал сою бекеті толық дезинфекцияланды. Оны жүргізуге 10 маман тартылды. Ауру белгісі табылған аумақта тұрған барлық малға қайтадан вакцина салынды. Малдың кейбірі ауру ошағынан таза аумаққа көшірілді», деді әкімнің орынбасары.
Ветеринарлық қызмет екі бағытта жүргізіледі. Біріншісі – төрт түлікке вакциналау жүргізетін ветеринарлық станса. Бұл құрылым жергілікті бюджет арқылы қаржыландырылады. Қазір Атырау қаласы мен 7 ауданда ветеринарлық стансалар бар. Бұл стансаларда 70-ге жуық маман жұмыс істейді. Былтыр жергілікті бюджет есебінен ветеринарлық стансаларға 42 жаңа автокөлік сатып алынған. Мәселен, Ресей Федерациясының Астрахан облысымен шектесетін әрі ауылдық округі көп Құрманғазы ауданына 12 көлік бөлініпті. Ал Қызылқоғаға – 6, Индер, Махамбет ауданының әрқайсысына – 5, Атырау қаласына, Исатай мен Жылыой ауданына – 4, Мақат ауданына 2 көліктен берілген.
Ал екіншісі – ветеринарлық бақылау мен қадағалау жүргізетін облыстық аумақтық инспекция. Сібір жарасы тіркелген соң, Астана мен Батыс Қазақстан облысынан қосымша мамандар шақыртылған.
«Биыл облыстың шаруашылық құрылымдары мен жеке иеліктегі төрт түлікті қауіпті ауруларға қарсы вакциналауға 3 млн доза дәрі бөлінді. Вакциналауды жергілікті ветеринарлық станса мамандары жүргізіп келеді. Осы кезге дейін малға 2 млн 800 мың доза дәрі егілді», дейді Жасұлан Бисембиев.
Сібір жарасының салдары қандай? Атырау облыстық денсаулық сақтау басқармасы басшысының орынбасары Алмагүл Әбілованың айтуынша, 22 қарашада қасапхана жұмысшысы №2 облыстық ауруханаға жеткізілген. Өйткені одан сібір жарасының бастапқы белгілері байқалған.
«Науқастың қолындағы жарақаттан ПЦР сынамасы алынды. Зертханалық талдау оң нәтиже берді. Науқасқа сібір жарасының терілік диагнозы қойылды», деп хабарлады А.Әбілова.
Өлген малмен байланыста болған 16 адам медицина қызметкерлерінің бақылауына алынды. Олардан сібір жарасын жұқтыру белгілері байқалмаған.
«Сібір жарасының бірнеше формасы бар. Бұл ауру малдан адамға қол мен аяқтың ашық жері арқылы жұғады. Оның белгілері 14 күн ішінде немесе 5-6 күнде анықталады. Аталған ауруды жұқтыру белгісі расталған науқасқа сібір жарасының терілік формасы деген диагноз қойылды. Бұл – жеңіл өтетін форма түрі. Қазір науқастың дене қызуы қалыпты, денсаулық жағдайы қанағаттанарлық. Медициналық хаттамаға сәйкес антибиотик терапиямен емделіп жатыр», деді А.Әбілова.
Атырау облысы
