Емдеу мекемесінің перзентхана бөлімшесінде бүгінгі уақыт талабына сай көптеген жаңашылдық орын алды. Бастысы, босану бөлмелері жеке жоспарланып, олар сапалы түрде барлық қажетті құрал-жабдықтармен қамтамасыз етілді. Босану бөлмелеріне ыңғайлы трансформер төсектер қойылып, кардиомонитор, баланың киімін ауыстырғанда жылытылатын үстелдер, операциялық шамдар, электронды таразылар, басқа да керек-жарақпен жабдықталуы ерекше назар аудартады. Сонымен қатар тек бір реттік жиынтықтар, катетерлер, инфузиялық жүйелер қолданылады. Перзентхана мен гинекологиялық бөлімшелердің медициналық құрал-жабдықтармен қамтылуы бүгінде 100 пайызды құрап отыр.
Қонаев қалалық көпсалалы ауруханасының перзентханасында әйелдер босанатын бөлмелердің өте ыңғайлы әрі қолайлы етіп жасалғанына жуырда босанған жас ана ризашылығын білдірді. Оның сөзінше, әйел толғатқанда өзін ыңғайлы сезініп, палатада еркін қозғалыста болады. Тіпті сүйікті әуенін тыңдай алатыны әйелдердің толғағын жеңілдетіп, қорқынышын сейілтуге септеседі. Сонымен қатар жеке киімдері мен гигиеналық құралдарын пайдалануға мүмкіндік бар.
«Біздің перзентхананың дәрігерлері табиғи босануды қолдайды. Сондықтан дәрігер тек босану кезеңін бақылайды, араласады, тек қатаң медициналық себептермен дәрі-дәрмектерді қолданады. Босану кезіндегі кез келген манипуляциялар медициналық араласу қажеттілігін егжей-тегжейлі түсіндіріп, босанған әйелдің келісімін алғаннан кейін ғана жүзеге асырылады. Бөлімшеде дені сау жүкті әйелдерге ғана емес, сонымен қатар тәуекел тобына жататын науқастарға, перинаталдық проблемалары бар әйелдерге де жоғары білікті медициналық көмек көрсетіледі. Сондай-ақ кесарь тілігінен кейін жатырында тыртығы бар әйелдерді де табиғи жолмен босандыру тәжірибесі жүзеге асырып жатыр. Кешенді бағалаудан кейін анамнез деректері, алдыңғы операция көрсеткіштерін егжей-тегжейлі қарастырамыз. Табиғи жолмен әйелдің өзі босануы мүмкіндігін анықтаймыз. Барлық медициналық іс-шараларды тек тәжірибелі акушер-гинекологтер жүргізеді, аурухана директоры, жоғары санатты акушер-гинеколог Айман Ғалымжанқызы жеке бақылауында ұстайды», дейді әйелдер кеңесінің акушер-гинеколог дәрігері Назгүл Елеусізова.
Алматы облысы
